Osea 10 - Vakavakadewa Makawa

Sa ra vunauci ko ira na Isireli e na vuku ni nodra beca na Kalou, kei na nodra dauqarava na ka lasu, 1-11. Sa ra vakaroti me ra veivutuni, 12-15.

¹ A vaini dautubu wale ko ira na Isireli, sa vuataka ga na vuana me kena: me vaka na kena levu ni vuana, sa ra vakalevutaka vakakina nai cabocabo-ni-soro; me vaka na kena vinaka ni nodra vanua, sa ra cakava na matakau vinaka.

² Sa veisei na lomadra: era na qai cala oqo: ena tamusuka ko koya na nodra i cabocabo-ni-soro, ena vakacacana na nodra matakau.

³ Ni ra na qai kaya oqo, Sa sega na noda tui, ni da sa sega ni rerevaki Jiova; ia a cava me cakava rawa na tui me yaga vei keda?

⁴ Era sa cavuta na vosa wale, ni ra bubului vakailasu ni ra ia na veiyalayalati: a sa tubu kina na lewa me vaka na co gaga e na tova ni were.

⁵ E na vukudrau na luve ni pulumokau mai Peci-aveni era na rere kina na kai Samaria: ni na tagicaka ko ira na lewena, o ira na kedrau bete talega ka daurekitaka, ni sa qai takali tani na kenai ukuuku.

⁶ Io, na ka talega ko ya ena kau ki Asiria me ka ni loloma vua na tui Jerupi; ena nodra na Ifireimi na madua, io, era na vakamaduataki na Isireli e na vuku ni nodra lewa.

⁷ Ko Samaria, sa muduki laivi na kena tui, sa vaka na malamala ni kau e dela ni wai.

⁸ Ena vakarusai talega na veiyasana cecere kei Eveni, na vu ni nodra i valavala ca na Isireli: a kau votovotoa kei na soni ena tubu e na nodra i cabocabo-ni-soro; ka ra na kaya ki na veiulu-ni-vanua, Ubi keimami mai; kei na veiulu-ni-koro, Lutuki keimami mai.

⁹ Mai na gauna i Kipea dou sai valavala ca ga, na Isireli: era a tu dei maikea: sa sega ni vauci ira na gone daucaka cala nai valu mai Kipea.

¹⁰ Ni'u sa gadreva me'u vakanakuitataki ira, era na soqoni vata vakaca vei ira ko ira na veimataqali, ni ra sa qai vesuki e na vuku ni nodra caka cala vakarua.

¹¹ Ia ko Ifireimi sa vaka na luve ni pulumokau sa dauvakavulici, sa vinakata ko koya me butuka na sila; ia koi au, ka'u a lako voli yani voleka ki na domona vinaka: au na vakavodoka e dua vei Ifireimi; ena ia na cukicuki ko Juta, ena ia na laulau ko Jekope.

¹² Dou kaburaka me nomudou na ka dodonu, dou tamusuka me vaka na loloma; dou taura me nomudou na qalau; ni sa kena gauna oqo mo dou qarai Jiova kina, me na lako mai ko koya, ka vakavulica vei kemudou na ka dodonu.

¹³ Dou a ia na cukicuki ca, dou a tamusuka kina nai valavala ca; dou a kania na vua ni lasu: ni dou a vakararavi ki na nomudou i valavala, ni ra lewe vuqa na nomudou qaqa.

¹⁴ O koya oqo ena tubu kina na ue vei ira na nomudou veimataqali, ia na nomudou koro kaukauwa kecega ena vakacacani, me vaka sa vakacacani Peci-aripeli ko Salimani e na siga ni valu: a tina ni gone ka viritaki vata kei na luvena.

¹⁵ Ena cakacaka vakakina vei kemudou ko Peceli e na vuku ni nomudou ca levu sara: era na muduki laivi sara na tui Isireli e na dua bauga na mataka.