Opetaia 1 - Vakavakadewa Makawa

Sa tukuna ni ra na vakacacani na kai Itomi e na vuku ni nodra yaloviavialevu, kei na nodra cati ira na wekadra na Jekope, 1-16. Ena vakabulai ko ira na Jekope, ka gumatua vei ira na nodra meca, 17-21. A raivotu i Opetaia.

¹ Sa kaya vakaoqo na Turaga ko Jiova e na vuku i Itomi; E dua nai rogorogo eda sa rogoca maivei Jiova, ia sa dua na mata sa talai ki na veimatanitu; Dou tu cake, me da mai tu cake me veivaluti kaya.

² Raica, au sa vakalailaitaki iko e na kedra maliwa na veimatanitu: ko sa beci vakalevu.

³ Sa vakacalai iko na viavialevu ni lomamu, ko iko ka tiko e na qara ni uluvatu, ka sa cecere na nomu i tikotiko; ka sa kaya e lomamu, O cei me na kauti au sobu ki na qele?

⁴ Kevaka ko tiko vakacecere me vaka na ikeli, ka viritu na nomu sova e na maliwa ni kalokalo, ia ka'u na kauti iko sobu maikeri, sa kaya ko Jiova.

⁵ Ke ra lako mai vei iko na daubutako se na daukove e na bogi, (ulei na nomu muduki laivi!) era na sega li ni butakoca ga na ka e rauti ira? ke ra lako mai vei iko na dauvetia na vua-ni-vaini, era na sega li ni vakavoca eso na vua-ni-vaini?

⁶ Na kena qarai na ka nei Iso! sa qarai e na nona yasana vuni!

⁷ Era sa kauti iko ko ira kece na nomu i to ki nai yalayala ni vanua: era vakaisini iko, ka rawai iko, ko ira na wekamu; ko ira era kana vata kei iko era cakava nai cori e rukumu; sa sega vua na vuku.

⁸ Me'u na sega li ni vakarusai ira tani na tamata vuku mai Itomi, kei ira na yalomatua mai na ulu-ni-vanua nei Iso, e na siga ko ya, sa kaya ko Jiova?

⁹ Ka ra na taqaya na nomu qaqa, ko iko Temani, me ra dui vakamatei mai na ulu-ni-vanua nei Iso ka oti kece kina.

¹⁰ E na vuku ni nomu i valavala kaukauwa vua na tacimu ko Jekope, ko na luvuci sara e na madua, ia ko na muduki laivi ka tawa mudu.

¹¹ E na siga ko sa tu tani kina, na siga sa vakabobulataka kina na nonai valu ko ira na kai tani, ka ra curu ko ira na meca ki na nona matamata-ni-koro, ka vakawiri madigi kei Jerusalemi, ko iko talega ko sa vaka e dua vei ira.

¹² Ia mo kakua ni vakaraica na kena siga na tacimu e na siga sa yacovi koya kina na ka tani; mo kakua talega ni marau ni yaco na ca kivei Juta e na siga ko ya; mo kakua talega ni vosa vakaviavialevu e na siga era rarawa kina:

¹³ Mo kakua talega ni curu ki na nodra matamata-ni-koro na noqu tamata e na siga era ca kina; io mo kakua ni vakaraica na nodra rarawa e na siga era ca kina; mo kakua talega ni kovea na nodra i yau e na siga era ca kina;

¹⁴ mo kakua talega ni tu e na basoga ni sala mo muduki ira na kai nona era dro bula; mo kakua talega ni soli ira na kai nona sa vo e na siga era rarawa kina.

¹⁵ Ni sa voleka mai na siga i Jiova vei ira kece na veimatanitu: ka me vaka na ka ko sa cakava, ena caka vakakina vei iko: na kemui sau ena lauta na ulumu.

¹⁶ Me vaka dou a gunu e na noqu ulu-ni-vanua tabu, era na gunu kece tiko vakakina na lewe ni veimatanitu, io, era na gunu, ka tiloma sara, ka ra na yaco me vaka era a sega ga.

¹⁷ Ia e na ulu-ni-vanua ko Saioni ena tiko na kena vo era dro bula, ena yalosavasava talega; ia na mataqali i Jekope ena taukena na nodra vanua.

¹⁸ Ia na mataqali i Jekope ena yaco me bukawaqa, kei na mataqali i Josefa me yameyame ni bukawaqa, kei na mataqali i Iso me vu-ni-sila, ka ra na vakawaqa, ka vakayavuna; ena sega talega e vo vei ira na mataqali i Iso; ni ka tukuna na ka oqo ko Jiova.

¹⁹ Ka ra na taukena na ulu-ni-vanua i Iso ko ira mai na mata ni ceva; kei ira mai na buca era na taukena na kai Filisitia; era na taukena talega na veiwere nei Ifireimi, kei na veiwere mai Samaria: ia ko Penijamini ena taukeni Kiliati.

²⁰ Ia ko ira sa bobula vei ira na mataivalu oqo, na Isireli, era tiko vata kei ira na kai Kenani, ka yacovi Sarifaci; kei ira era sa bobula vei ira na kai Jerusalemi era tiko mai Sifarati, era na taukena na veikoro e na mata ni ceva.

²¹ Ka ra na lako cake mai eso nai vakabula ki na ulu-ni-vanua ko Saioni me lewa na ulu-ni-vanua i Iso; ia na matanitu ena qai nei Jiova.