Niemaia 8 - Vakavakadewa Makawa

Sa wilika ko Esera nai vola ni vunau vei ira kece na tamata, 1-12. Sa ia na so levu ni vale taba ni kau, 13-18.

¹ A ra sa soqoni vata ko ira na tamata kecega, me vaka era sa le dua ga na tamata, ki na salatu sa donuya na matamata-ni-koro ni wai; a ra sa kaya vei Esera na vunivola, me kauta mai nai vola ni vunau i Mosese, ka vakarota ko Jiova vei ira na Isireli.

² A sa kauta nai vola ni vunau ko Esera na bete kivei ira nai soqosoqo, ko ira na tagane kei ira na yalewa, kei ira kecega era sa yalomatua me ra kila rawa, e nai matai ni siga e nai kavitu ni vula.

³ A sa wilika kina ko koya e na mata ni salatu sa donuya na matamata-ni-koro ni wai, mai na mataka ka yacova na siga levu, e na matadra na tagane, kei ira na yalewa, kei ira era kila rawa; a ra sa vakarorogo vakavinaka na tamata kecega ki nai vola ni vunau.

⁴ A sa tu ko Esera na vunivola e nai tutu kau, era sa cakava me yaga kina; a sa tu voleka vua ko Maticea, kei Sema, kei Anaia, kei Uraija, kei Ilikaia, kei Meesea, e na ligana i matau; ia ki na ligana i mawi, ko Pitaia, kei Misaeli, kei Malikaia, kei Asumi, kei Asipatani, ko Sakaraia, ko Mesulame.

⁵ A sa tevuka nai vola ko Esera e matadra na tamata kecega; (ni sa cecere cake ko koya vei ira na tamata kecega;) ia ni sa tevuka, era sa tu cake na tamata kecega:

⁶ ka sa vakarokorokotaki Jiova na Kalou levu ko Esera. A ra sa kaya, Emeni, Emeni, ko ira na tamata kecega, ka dulaki liga: a ra sa vakacuva na uludra, ka vakarokoroko vei Jiova ni ra sa vakanamata ki na qele.

⁷ Ia ko Jesua, kei Pani, kei Serepaia, ko Jamini, ko Akupi, ko Sapicei, ko Otaia, ko Meesea, ko Kilita, ko Asaraia, ko Josapati, ko Anani, ko Pilaia, kei ira na Livai, era vakamacalataka na vunau vei ira na tamata: a ra sa tu na tamata e nodra tikina.

⁸ A ra sa wilika vakamalua nai vola ni vunau ni Kalou, ka vakatakila na kenai balebale, ka vakamacalataka na ka sa wili.

⁹ Ia ko Niemaia na kovana, kei Esera na bete, na vunivola, kei ira na Livai, era sa vakavulici ira na tamata, era sa kaya vei ira kecega na tamata, A siga oqo sa tabu me nei Jiova na nomuni Kalou; ni kakua ni loma bibi, se tagi. Ni ra sa tagi ko ira kecega na tamata, ni ra sa rogoca na vosa ni vunau.

¹⁰ Sa qai kaya vei ira ko koya, Ni lako, ni kania na kena uro, ka gunuva na kena kamikamica, ka vakauta nai votavota vei ira sa sega na ka sa vakarautaki kina: ni sa tabu na siga oqo me nei koya na noda Turaga: ia me kakua ni bibi na lomamuni; ni sa vu ni nomuni kaukauwa me marautaki Jiova.

¹¹ A ra sa vakacegui ira na tamata kecega ko ira na Livai, ni ra kaya, Ni tiko lo, ni sa tabu na siga oqo; ni kakua talega ni yalorarawa.

¹² A ra sa lako yani ko ira kecega na tamata me ra kana, ka gunu, ka me ra vakauta nai votavota, ka me ra marau vakalevu, ni ra sa kila na vosa sa tukuni vei ira.

¹³ Ia e na kenai karua ni siga, era sa soqoni vata ko ira na nodra turaga qase na tamata kecega, kei ira na bete, kei ira na Livai, kivei Esera na vunivola, me ra kila na vosa ni vunau.

¹⁴ A ra sa kunea ni sa volai e na vunau ka vakarota ko Jiova e na gusu i Mosese, me ra tiko e na veivale taba ni kau ko ira na Isireli, e na so levu sa dauia e nai kavitu ni vula:

¹⁵ ka me ra tukuna yani ka vakarogoya e na nodra veikoro kecega, kei Jerusalemi, ka vaka, Ni lako yani ki na ulu-ni-vanua, ka kauta mai na taba ni olive, kei na taba ni paini, kei na taba ni mateli, kei na taba ni balabala, kei na taba ni kau rugurugua, me caka kina na veivale taba ni kau, me vaka sa volai.

¹⁶ A ra sa lako yani ko ira na tamata, ka kauta mai, ka tara na nodra veivale taba ni kau, na tamata yadua e na dela ni nona vale, e na nodra lomanibai talega, kei na lomanibai ni vale ni Kalou, kei na sala mai na matamata-ni-koro ni wai, kei na sala mai na matamata-ni-koro i Ifireimi.

¹⁷ Ia ko ira nai soqosoqo taucoko era sa tale mai na tiko vakabobula, era sa cakava na veivale taba ni kau, ka tiko e ruku ni veivale taba ni kau: era sa sega ni cakava vakakina ko ira na Isireli mai na gauna i Josua na luve i Nuni. Ka sa dua na marau levu sara.

¹⁸ Ia e na veisiga, mai nai matai ni siga ka yacova na siga sa kenai tinitini, sa wilika tiko ko koya nai vola ni vunau ni Kalou. A ra sa ia tiko na so levu ka bogi vitu, ia e nai kawalu ni siga, sa caka e dua nai soqosoqo tabu, me vaka na kenai valavala.