Niemaia 4 - Vakavakadewa Makawa

Ni sa le vuqa ka gumatua ko ira na meca, sa daumasu ko Niemaia, ka ra kitaka ga na cakacaka ko ira na tamata, a ra sa vakaiyaragi tu.

¹ Ia ni sa rogoca ko Sanipalati, ni keimami sa viria na bai, sa cudru sara ko koya, ka levaci ira na Jiu, ka vakalialiai ira.

² A sa vosa ko koya e matadra na wekana kei nai valu ni Samaria, ka kaya, A cava era sa mai kitaka ko ira na Jiu malumalumu oqo? era na vakaukauwataki ira li vakataki ira? era na vakacaboi soro li? era na vakaotia beka e na dua bau na siga? era na vakavinakataka tale li na veivatu mai nai soqosoqo sa kama oti?

³ A sa tu vata kaya ko Topaia na Amoni, ka sa kaya ko koya, Na ka era na viria, kevaka sa butuka wale e dua na fokise, ena qeqera sobu na nodra bai vatu.

⁴ Mo ni rogoca, na neimami Kalou; ni keimami sa beci; ka mo ni vakalesuya na nodra vosa ca me tau ki na uludra, ka soli ira me ra kau yani ki na vanua ni veivakabobulataki:

⁵ ia mo ni kakua ni buluta na nodra caka cala, me kakua talega ni bokoci na nodra i valavala ca e matamuni: ni ra sa vakacudrui kemuni e matadra era sa viri bai.

⁶ Ia keimami sa viri bai tiko, ka sa veiuturi na bai taucoko, ia na kena cecere cake sa yacova na kena veimama: ni ra sa gumatua e na cakacaka ko ira na tamata.

⁷ Ia ni ra sa rogoca ko Sanipalati, kei Topaia, kei ira na kai Arepea, kei ira na Amoni, kei ira na kai Asitoti, ni sa veiuturi na bai kei Jerusalemi, ka sa vakatekivu me viri vinaka, na tikina ka basuki; era sa qai cudru vakalevu,

⁸ ka ra buki vere vata ko ira kece me ra vala kei Jerusalemi, me ra tarova.

⁹ Ia keimami sa ia tiko na neimami masu vua na neimami Kalou, ka lesia nai vakatawa me yadravi ira e na siga kei na bogi, e na vukudra.

¹⁰ A sa kaya ko ira na Juta, Sa yali sobu na nodra kaukauwa na daucolacola, ka sa levu nai soqosoqo; eda sa sega ni viria rawa kina na bai.

¹¹ A ra sa kaya na noda meca, Era na sega ni kila, se kunea, eda na yaco vakidacala mada ki na kedra maliwa, ka vakamatei ira, ka vakadaroya na cakacaka.

¹² Ia ni ra sa lako mai ko ira na Jiu era sa tiko voleka vei ira, era sa kaya vakatini vei keimami, Mai na veiyasana kecega kemuni sa lesu mai kina vei keimami, era na sikiti keda.

¹³ O koya ka'u a lesi ira kina na tamata, e na veiyasana era, mai daku ni bai, kei na veiyasana cecere, ka'u a lesi ira na tamata e na nodra mataqali me ra vakaiseleiwau, ka vakamoto, ka vakadakai dina.

¹⁴ Ia ka'u a rai voli, ka tu cake, ka kaya vei ira na turaga, kei ira na turaga e lewa tiko kei ira na tamata sa vo, Ni kakua ni rerevaki ira: ni nanumi Jiova, sa levu ka rerevaki, ia ni vala e na vukudra na wekamuni na luvemuni tagane, kei na luvemuni yalewa, na watimuni, kei na nomuni veivale.

¹⁵ Ia ni ra sa rogoca ko ira na neimami meca ni sa kilai vei keimami, a sa vakatawayagataka ko koya na Kalou na ka era a bosea, keimami sa lesu kecega ki na bai, na tamata yadua ki na nonai tavi.

¹⁶ Ia mai na gauna ko ya, sa cakacaka ko ira e dua na kena wase ni noqu tamata, a ra sa taura ko ira na wase kadua na moto, kei nai sasabai, kei na dakai dina, kei nai yaragi; a ra sa tiko e dakudra kecega na Juta ko ira na turaga era lewa.

¹⁷ Ko ira era sa viria cake na bai, kei ira era daucolacola, kei ira era sa kau ka, era cakacaka e na dua na ligadra, ka ra taura nai yaragi e na ligadra kadua:

¹⁸ ia ko ira sa viri bai tiko era sa vauca yadua na nonai seleiwau ki na dibina, ka viri bai tiko. A sa tiko vata kei au ko koya sa dauuvu davui.

¹⁹ Au a qai kaya vei ira na turaga, vei ira talega era lewa tiko, vei ira kece talega na tamata, Sa levu na cakacaka oqo, ka balavu ka da sa veitawasei tu e na dela ni bai, ka veiyawaki e dua mai na dua:

²⁰ Ia na tikina kemuni na rogoca kina na davui, ni soqoni kece kina vei keitou: ena vala e na vukuda na noda Kalou.

²¹ Ia keimami a cakacaka tiko: a ra sa taura tu na moto e dua na kena wase, mai na mataka caca ka yacova na kena rairai mai na veikalokalo.

²² Au a kaya talega vei ira na tamata e na gauna ko ya, Me ra dui moce yadua kei ira na nodra tamata e Jerusalemi, me ra vakatawai keda e na bogi, ka cakacaka e na siga.

²³ Ia koi au, kei ira na wekaqu, kei ira na noqu tamata, kei ira nai vakatawa era muri au, sa sega e dua vei keimami sa luvata tani na nonai sulu, ia me sava ga era sa qai luvata.