Niemaia 2 - Vakavakadewa Makawa

Ni sa kila ko koya na tui Perisia na ka e rarawa kina ko Niemaia, sa talai koya ki Jerusalemi; a sa vakarota kina ko Niemaia na viri bai.

¹ Ia e na vula ko Naisani, e nai karuasagavulu ni yabaki ni lewa i Atakisekise na tui, sa vakarau tu na mena waini: ia ka'u a taura cake na waini, ka solia vua na tui. Ia ka'u sa sega ni vakaveveku mata eliu e matana.

² Ka sa kaya kina vei au ko koya na tui, A cava ko sa vakaveveku mata kina, ni ko sa sega ni tauvi mate? sa sega ni ka tani oqo, na rarawa ga ni lomamu. Au a qai rere vakalevu sara,

³ ka kaya vua na tui, Me bula na tui ka tawa mudu: me'u sega beka ni vakaveveku mata, ni sa rusa tu na koro, na yasana ni nodra i bulubulu na noqu qase, a sa kama e na bukawaqa na kena veimatamata-ni-koro? Sa qai kaya vei au ko koya na tui, A cava ko sa kerea?

⁴ Au sa qai masu vua na Kalou ni lomalagi.

⁵ Ia ka'u sa kaya vua na tui, Kevaka e vinaka vua na tui, ka kevaka ko ni sa lomani au na nomuni tamata, mo ni talai au ki Juta, ki na koro ni nodra i bulubulu na noqu qase, me'u tara tale mada.

⁶ A sa kaya vei au ko koya na tui, (ni sa tiko talega kaya na ranadi,) O ni la'ki vula vica yani? ka ko na lesu tale mai ninaica? A sa vinaka vua na tui me talai au; au a qai lokuca vua na kena vula.

⁷ Au a kaya talega vua na tui, Kevaka e vinaka vei kemuni na tui, mo ni solia ga vei au nai vola vei ira na kovana mai tai kadua ni uciwai, me ra kauti au yani me'u yaco mada ki Juta;

⁸ kei nai vola vei Esafa nai vakatawa ni nona veikau na tui, me solia vei au ko koya na kau me kena kau ni matamata-ni-koro ni yasana kaukauwa ni vale, kei na bai ni koro talega, kei na vale ka'u na tiko kina. A sa solia vei au ko koya na tui me vaka na ligana vinaka na noqu Kalou ka tiko vei au.

⁹ Au a qai lako vei ira na kovana mai na tai kadua ni uciwai, ka solia vei ira nai vola ni tui. Ia sa tala vata kei au ko koya na tui, eso na turaga ni valu ka so era sa vodo ose.

¹⁰ Ia ni sa rogoca ko Sanipalati na kai Oroneimi, kei Topaia e dua na dauveiqaravi, na luve i Amoni, erau sa rarawa vakalevu ni sa lako mai e dua na tamata me segata na ka me ra vinaka kina ko ira na Isireli.

¹¹ Ia ka'u a yaco ki Jerusalemi, ka tiko kina bogi tolu.

¹² Keitou a qai cavu tu e na bogi, koi keitou kei iratou na tamata e lewe vica; ia ka'u a sega ni tukuna vua e dua na tamata na ka sa vakatubura e na lomaqu na noqu Kalou me'u cakava e Jerusalemi: sa sega tale vei au e dua na manumanu, na manumanu ga ka'u a vodoka.

¹³ Ia ka'u a curu yani e na bogi e na matamata-ni-koro ki na buca, io e na mata ni keli-wai ni gata, kei na matamata-ni-koro ni benubenu, ka vakaraica matua na bai kei Jerusalemi, ka basuraki sobu, a sa kama e na bukawaqa na kena matamata-ni-koro.

¹⁴ Au a qai lako yani ki na matamata-ni-koro mai nai keli-wai, kei na nonai keli-wai levu na tui: a sa sega na tikina me lako yani kina na manumanu ka'u sa vodoka.

¹⁵ Au a qai lako cake e na soniwai e na bogi, ka vakaraica matua na bai, ka lesu yani, ka curu e na matamata-ni-koro ki na buca, ka lesu tale.

¹⁶ A ra sa sega ni kila ko ira na turaga se'u sa lako kivei, se cava ka'u a cakava; sa sega talega ni'u tukuna vei ira na Jiu, se vei ira na bete, se vei ira na turaga, se vei ira era lewa tiko, se vei ira era sa kitaka na cakacaka.

¹⁷ Au a qai kaya vei ira, Kemuni sa raica ni da sa tiko vakaca, ni sa rusa koto ko Jerusalemi, a sa kama e na bukawaqa na kena matamata-ni-koro: tou ia, tou viria na bai kei Jerusalemi, me da kakua ni rogo ca tiko.

¹⁸ Au a qai tukuna vei ira ni sa vinaka vei au na ligana na noqu Kalou; kei na vosa talega ni tui ka vosataka vei au ko koya. Era sa qai kaya, Tou ia, ka viribai. A ra sa vakaukauwataka na ligadra ki na cakacaka vinaka oqo.

¹⁹ Ia ni ratou sa rogoca ko Sanipalati na kai Oroneimi, kei Topaia na dauveiqaravi na luve i Amoni, kei Kesemi na kai Arepea, eratou sa dredre ka vakalialiai keda, ka beci keda, ka kaya, a cava na ka oqo dou sa kitaka? dou na talaidredre beka vua na tui?

²⁰ Au a qai kaya vei iratou, Na Kalou kei lomalagi, ena vakayacora na ka keimami sa cakava; o koya keimami na viri bai koi keimami na nona tamata: ia koi kemudou, sa sega na nomudou i votavota, se na ka e dodonu me nomudou, se dua na ka mo dou nanumi kina e Jerusalemi.