Niemaia 13 - Vakavakadewa Makawa

Sa wili nai vola ni vunau; a sa vakarota ko Niemaia me biu nai valavala sa sega ni dodonu.

¹ E na siga ko ya era sa wilika nai vola i Mosese, a ra sa rogoca tiko ko ira na tamata; ka sa kune ni sa volai kina, me ra kakua ni curu ki nai soqosoqo ni Kalou ka tawa mudu ko ira na Amoni kei ira na Moapi;

² ni ra sa sega ni la'ki tavaki ira na Isireli ka kauta na madrai kei na wai, a ra sa voli Pelami me nodra meca, me vatonaki ira ko koya: ia ka sa vukica na veivatonaki ko koya na noda Kalou me vosa ni veivakalougatataki.

³ Ia ni ra sa rogoca oti na vunau, era sa wasei ira tani vei ira na Isireli na kai tani kecega era tiko vata.

⁴ A sa veiwekani eliu kei Topaia ko Ilaiasipi na bete, ko koya ka lewa na tiki-ni-vale e cake e na vale ni noda Kalou:

⁵ a sa vakarautaka me nona e dua na tiki-ni-vale levu e cake, era a daubinia kina eliu nai madrali laukana, kei na kau boi vinaka, kei nai yaya, kei nai katini ni sila, kei na waini vou, kei na waiwai, sa lewai me nodra na Livai, kei ira na dau-ni-sere, kei ira nai vakatawa ni katuba; kei na ka e vakacabori me nodra na bete.

⁶ Ia e na veisiga oqo, ka'u a sega ni tiko mai Jerusalemi: ni'u a lesu vua na tui e nai katolusagavulu ka rua ni yabaki ni tui ko Atakisekise na tui Papiloni, ia ni sa oti na siga eso, sa qai sereki au ko koya na tui;

⁷ ka'u a qai lako mai ki Jerusalemi, ka'u sa qai kila na ca sa cakava ko Ilaiasipi e na vuku i Topaia, ni sa vakarautaka me nona e dua na tiki-ni-vale e cake e loma ni bai ni vale ni Kalou.

⁸ Ia ka'u a rarawa vakalevu kina: ka biuta ki tautuba nai yaya kecega mai na vale i Topaia mai na tiki-ni-vale e cake.

⁹ Au a qai vakarota, ka ra sa vakasavasavataka na veitiki-ni-vale e cake: au a qai kauta tale kina nai yaya ni vale ni Kalou, kei nai madrali laukana kei na kau boi vinaka.

¹⁰ Au a qai kila ni sa sega ni soli na kedrai votavota na Livai ia ko ira na Livai kei ira na dau-ni-sere, era sa dauia na cakacaka, era sa dui dro ki na nona were.

¹¹ Au a qai vunauci ira na turaga, ka kaya, A cava sa biu kina na vale ni Kalou? Ia ka'u a vakasoqoni ira vata, ka vakalesui ira tale ki na nodra i tutu.

¹² Era sa qai kauta mai ko ira kecega na Juta nai katini ni sila, kei na waini vou, kei na waiwai, ki na vale ni yau.

¹³ Ia ka'u a lesia na tamata eso me lewa na veivale ni yau, ko Selemaia na bete, kei Setoki na vunivola, ka maivei ira na Livai, ko Pitaia: a sa taravi ira ko Anani na luve i Sakuri, na luve i Matanaia: ni ra sa daunanumi ni ra tamata dodonu, a sa dau nodra i tavi me ra vota vei ira na wekadra.

¹⁴ Mo ni nanumi au, na noqu Kalou, e na vuku ni ka oqo, ka mo ni kakua ni qusia laivi na noqu cakacaka vinaka ka'u sa cakava ki na vale ni noqu Kalou, kei na kena cakacaka.

¹⁵ E na gauna oqori au a kunea e Juta eso era butuka nai keli waini e na siga ni vakacecegu, ka ra kauta mai nai vau sila, ka vakavodoka nai kaukau ki na asa; na waini talega, kei na vua ni vaini, kei na lolo, kei nai kaukau kecega, era sa kauta ki Jerusalemi e na siga ni vakacecegu: ia ka'u a beitaki ira e na siga era volitaka kina na kakana.

¹⁶ Sa tiko talega kina eso na kai Taia, era sa kauta mai na ika, kei nai yau kece, ka volitaka e na siga ni vakacecegu vei ira na Juta, e Jerusalemi talega.

¹⁷ Au a qai vunauci ira na turaga ni Juta, ka kaya vei ira, A cava na ka ca oqo dou sa kitaka, ka vakacacana na siga ni vakacecegu?

¹⁸ Era a sega beka ni kitaka vakaoqo ko ira na nomudou qase, ka sega li ni vakayacora na noda Kalou na ka ca kece oqo vei keda, kei na koro oqo? ia dou sa qai kuria ga na cudru vei ira na Isireli ni dou sa vakacacana na siga ni vakacecegu.

¹⁹ Ia ni sa qai butobuto mai na veimatamata-ni-koro ni Jerusalemi e na siga vakarau, au a vakarota me sogo na veimatamata-ni-koro, ka kaya me kakua ni dolavi tale me oti mada na siga ni vakacecegu: ka so vei ira na noqu tamata ka'u a lesia ki na veimatamata-ni-koro, me kakua ni kau mai e dua nai kaukau ena siga ni vakacecegu.

²⁰ A ra sa moce vakadua se vakarua e nai bili mai Jerusalemi ko ira na dauveivoli, kei ira era volitaka na ka kecega.

²¹ Au a qai beitaki ira, ka kaya vei ira, A cava dou sa moce kina voleka ki na bai? kevaka dou sa kitaka tale, au na tauri kemudou. Mai na gauna ko ya, era sa sega tale ni lako mai kina e na siga ni vakacecegu.

²² Ia ka'u a vakaroti ira na Livai me ra vakasavasavataki ira, ka me ra lako mai ka vakatawa na veimatamata-ni-koro, ka me vakatabui kina na siga ni vakacecegu. Mo ni nanumi au, na noqu Kalou, e na vuku ni ka talega oqo, ka vosoti au me vaka na kena levu ni nomuni loloma.

²³ E na gauna talega oqori ka'u a kunea eso na Jiu era veiwatini kei ira na nodra yalewa na Asitoti, kei ira na Amoni, kei ira na Moapi:

²⁴ ka ra sa vosa ko ira na luvedra eso e na vosa vaka-Asitoti, ka sega ni vosa rawa e na nodra vosa na Jiu, era vosataka ruarua vakatikina.

²⁵ Ka'u a qai vunauci ira, ka vatonaki ira, ka yaviti ira eso, ka vutia na drau ni uludra, ka'u kaya vei ira me ra bubului vua na Kalou, ni'u kaya, Dou kakua ni solia na nomudou goneyalewa vei ira na nodra gonetagane, se kauta na nodra goneyalewa vei ira na nomudou gonetagane, se kivei kemudou.

²⁶ E sega li ni cala ko Solomoni na tui Isireli e na ka oqo, ia ka sega na tui e na veimatanitu e vuqa me tautauvata kaya, ni sa lomani koya na nona Kalou, ka lesi koya na Kalou me nodra tui na Isireli kecega: ia ka sa vakacalai koya ko ira na yalewa era lako tani mai?

²⁷ Keitou na qai vakarorogo li vei kemudou me kitaka na ka ca levu oqo, ka me talaidredre vua na noda Kalou mo dou veiwatini kei na yalewa era lako tani mai?

²⁸ Ka sa dua vei ira na luve i Joiata, na luve i Ilaiasipi na bete levu, na vugo i Sanipalati na kai Oroneimi: ko koya ka'u a vakasavi koya tani kina.

²⁹ Mo ni nanumi ira, na noqu Kalou, ni ra sa vakadukadukalitaka na cakacaka vakabete, kei na vosa ni yalayala ni cakacaka vakabete, kei na nodra talega na Livai.

³⁰ Ia ka'u a vakasavasavataki ira maivei ira na kai tani kecega, ka lesia na nodra i tavi na bete kei na nodra i tavi na Livai, ko ira yadua ki na nonai tavi,

³¹ e na vuku talega ni madrali buka e na kena gauna, kei nai sevu. Mo ni nanumi au, kemuni na noqu Kalou, me'u vinaka kina.