Niemaia 12 - Vakavakadewa Makawa

Ko ira na bete kei ira na Livai era sa lako mai Papiloni, 1-26. Sa vakatabui na bai, 27-43. Eso sa lesi ki na cakacaka e na vale ni soro, 44-47.

¹ Ia ko ira oqo na bete kei ira na Livai era a lako cake kei Serupapeli na luve i Sialitieli ka tagane, kei Jesua: ko Siraia, ko Jeremaia, ko Esera;

² ko Amaraia, ko Maluki; ko Atusi;

³ ko Sekanaia, ko Riumi, ko Meremoce;

⁴ ko Ito, ko Kinico, ko Apaija;

⁵ ko Maijamini, ko Meataia, ko Pilika;

⁶ ko Semaia, kei Joiaripi, ko Jitaia;

⁷ ko Salu, ko Amoki, ko Ilikaia, ko Jitaia. Ko ira oqo sa liu vei ira na bete, kei ira na wekadra, e na gauna i Jesua.

⁸ Ia ko ira na Livai: ko Jesua, ko Pinui, ko Katimieli, ko Serepaia, ko Juta, ko Matanaia, ko koya sa lewa na vakavinavinaka, ko koya kei ira na wekana.

⁹ Kei Pakipukaia kei Uni, na wekadra, erau sa donui ira e na vale ni vakatawa.

¹⁰ A sa sucu na luve i Jesua ko Joiakimi, a sa sucu na luve i Joiakimi ko Ilaiasipi, a sa sucu na luve i Ilaiasipi ko Joiata,

¹¹ a sa sucu na luve i Joiata ko Jonacani, a sa sucu na luve i Jonacani ko Jatua.

¹² Ia ko ira na bete e na gauna i Joiakimi era sa turaga vei ira na qase: maivei Siraia, ko Miraia; maivei Jeremaia, ko Enanaia;

¹³ maivei Esera, ko Mesulame; maivei Amaraia, ko Jioanani;

¹⁴ maivei Maluki, ko Jonacani; maivei Sipanaia, ko Josefa;

¹⁵ maivei Erimi, ko Atina; maivei Miraioca, ko Elikai;

¹⁶ maivei Ito, ko Sakaraia; maivei Kinico, ko Mesulame;

¹⁷ maivei Apaija, ko Sikiri; maivei Miniamini na kai Moataia, ko Pilitai;

¹⁸ maivei Pilika, ko Samua; maivei Semaia, ko Jionacani;

¹⁹ ia maivei Joiaripi, ko Matinai; maivei Jitaia, ko Usai;

²⁰ maivei Salai, ko Kalai; maivei Amoki, ko Iperi;

²¹ maivei Ilikaia, ko Esapaia; maivei Jitaia, ko Nicaneli.

²² Ko ira na Livai e na gauna i Ilaiasipi, ko Joiata, kei Joenani, kei Jatua, era sa volai me liu vei ira na qase: kei ira talega na bete, ka yacova na lewa i Taraiase na kai Perisia.

²³ Ko iratou na Livai, eratou sa liu vei ira na qase, eratou sa volai e nai vola ni veika sa caka, ka yacova na gauna i Joenani na luve i Ilaiasipi.

²⁴ Kei iratou sa liu vei ira na Livai: ko Esapaia, ko Serepaia, kei Jesua na luve i Katimieli, kei na wekadra era sa donui ira, me dauia na vakavinavinaka kei na vakamolimoli, me vaka nai vakaro i Tevita na tamata ni Kalou, sa veidonui na vale ni vakatawa.

²⁵ Ko Matanaia, kei Pakipukaia, ko Opetaia, ko Mesulame, ko Talimoni, ko Akupi, erai vakatawa, era sa vakatawa tiko e na vale ni yau mai na matamata-ni-koro.

²⁶ Ko iratou oqo e na gauna i Joiakimi na luve i Jesua ka tagane, na luve i Josataki ka tagane, kei na gauna i Niemaia na kovana, kei Esera na bete, na vunivola.

²⁷ Ia ni sa vakatabui me nei Jiova na bai kei Jerusalemi era sa vakasaqarai ira na Livai mai na nodra yasana kecega, me kauti ira ki Jerusalemi, me ra vakacabora e na marau, e na vakamolimoli, ka ia na sere, kei na sibali, kei na soliteri, kei na api.

²⁸ A ra sa soqoni vata ko ira na luvedra tagane na dau-ni-sere, mai na vanua bucabuca sa vakavolivoliti Jerusalemi, kei na nodra veikoro lalai na kai Nitofa;

²⁹ mai na vale talega ni Kilikali, kei na vanua teitei ni Kipa kei Asimavece; ni ra sa tara na nodra veikoro lalai ko ira na dau-ni-sere me vakavolivoliti Jerusalemi.

³⁰ A ra sa vakasavasavataki ira ko ira na bete kei ira na Liva, ka vakasavasavataki ira na tamata, kei na veimatamata-ni-koro, kei na bai.

³¹ Au a qai kauti ira cake na turaga ni Juta ki na dela ni bai, ka lesia e rua nai vavakoso lelevu me ia na vakavinavinaka, e dua sa lako ki na liga i matau e na dela ni bai vaka ki na matamata-ni-koro ni benubenu:

³² a sa muri ira ko Osaia, ka dua na kena wase ni turaga ni Juta,

³³ kei Asaraia, ko Esera, ko Mesulame,

³⁴ ko Juta, kei Penijamini, kei Semaia, kei Jeremaia,

³⁵ ka so vei ira na luvedra tagane na bete era vakadavui: ko Sakaraia na luve i Jonacani ka tagane, na luve i Semaia ka tagane, na luve i Matanaia ka tagane, na luve i Mekaia ka tagane, na luve i Sakuri ka tagane, na luve i Esafa ka tagane:

³⁶ kei iratou na wekana: ko Semaia, kei Esareli, ko Milelai, ko Kilelai, ko Maai, ko Nicanieli, kei Juta, ko Anani, era kauta na ka domo vinaka i Tevita na tamata ni Kalou, kei Esera na vunivola sa liutaki ira.

³⁷ Ia mai na matamata-ni-koro ni mata-ni-wai, sa donui ira, era sa cabeta nai cabecabe ki na koro i Tevita, mai nai cabecabe ki na koro i Tevita, mai nai cabecabe ni bai, sa toka e cake ka toka era na vale i Tevita, ka yacova na matamata-ni-koro ni wai vaka ki na tu-i-cake.

³⁸ Ia nai vavakoso kadua sa ia na vakavinavinaka era lako me ra tavaki ira, ia ka'u a muri ira vata kei na dua na kena wase ni tamata e na dela ni bai, mai na yasana ni vale-cecere ni lovo, ka yacova na bai rabailevu;

³⁹ mai na bai talega e dela ni nodra matamata-ni-koro ko Ifireimi, kei na matamata ni koro makawa, kei na matamata-ni-koro ni ika, kei na vale-cecere i Ananeli, kei na vale-cecere i Mea, ka yacova na matamata-ni-koro ni sipi: a ra sa tu vakadua e na matamata-ni-koro ni vale ni veivesu.

⁴⁰ A ra sa tu nai vavakoso ruarua era sa vakavinavinaka e na vale ni Kalou, koi au talega, ia ka dua vei rau nai lawalawa turaga sa tu vata kei au:

⁴¹ kei ira na bete: ko Elaiakimi, ko Meesaia, ko Miniamini, ko Mekaia, ko Elioenai, ko Sakaraia, ko Enanaia, a ra sa vakadavui;

⁴² kei Meesea, kei Semaia, kei Eliesa, kei Usai, kei Jioanani, kei Malikaia, kei Ilama, kei Esa. A ra sa sere vakadomoilevu ko ira na dau-ni-sere, a sa nodra turaga ko Jeseraia.

⁴³ Era sa vakacabora talega nai soro levu eso e na siga ko ya, ka marau: ni sa vakamarautaki ira na Kalou e na marau levu: sa reki talega ko ira na watidra kei ira na gone: a sa rogo vakayawa yani na reki mai Jerusalemi.

⁴⁴ Ia e na gauna ko ya sa lesi eso me vakaraica na veivale ni yau, me yau kina nai madrali, kei nai sevu, kei nai katini ni ka, me kumuni vata kina nai votavota sa tukuni e na vunau me nodra na bete kei ira na Livai, io mai na veiwere kei na veikoro: ni sa marau ko ira na Juta e na vukudra na bete kei ira na Livai era sa qarava tiko.

⁴⁵ Ia ko ira na dau-ni-sere, kei ira nai vakatawa ni katuba, era sa vakabauta na vunau sa lesia vei ira na Kalou, kei na vunau sa bale ki na veivakasavasavataki, me vaka nai vakaro i Tevita, kei Solomoni na luvena.

⁴⁶ Ni sa tiko eliu e na gauna i Tevita kei Esafa, eso sa liu vei ira na dau-ni-sere, kei na sere ni vakavinavinaka kei na vakamolimoli vua na Kalou.

⁴⁷ Ia ko ira kecega na Isireli, e na gauna i Serupapeli, kei na gauna i Niemaia, era vota na kedrai votavota na dau-ni-sere, kei ira nai vakatawa ni katuba, sa votai e na veisiga kecega: a ra sa vakatabuya na ka eso me kedra na Livai; ia ko ira na Livai era sa vakatabuya me kedra na luve i Eroni.