Niemaia 1 - Vakavakadewa Makawa

Sa rarawa ko Niemaia ni sa rogoca sa ca ko Jerusalemi; a sa tagi, ka lolo, ka masu vua na Kalou.

¹ A vosa i Niemaia na luve i Akalaia ka tagane. Ia e na vula ko Kisiliu, e na kenai karuasagavulu ni yabaki, ni ka'u a tiko mai Susani e na vale ni tui,

² sa lako mai ko Anani, e dua vei ira na wekaqu, ka so vei ira na Juta; ia ka'u a tarogi iratou e na vukudra na Jiu era sa dro bula, ko ira na kena vo vei ira na vakabobulataki, e na vuku talega i Jerusalemi.

³ A ratou sa kaya vei au, Ko ira sa vo vei ira na vakabobulataki mai na yasana ko ya, era sa tiko vakaca sara, a ra sa vosavakacacataki: sa basuraki sobu talega na bai kei Jerusalemi, a sa kama e na bukawaqa na kena veimatamata-ni-koro.

⁴ Ia ni'u sa rogoca na vosa oqo, au sa tiko sobu ka tagi, ka yaso bogi vica, ka lolo, ka masu vua na Kalou ni lomalagi, ka kaya,

⁵ Au sa masuti kemuni, Jiova na Kalou kei lomalagi, na Kalou levu ka rerevaki, sa vakabauta tiko na nomuni vosa ni yalayala kei na yalololoma vei ira era sa lomani kemuni ka vakabauta na nomuni vunau:

⁶ me rogo mada na daligamuni, ka me yadra na matamuni, mo ni rogoca kina na masumasu ni nomuni tamata, ka'u sa qai cabora e matamuni, e na siga kei na bogi, e na vukudra na Isireli na nomuni tamata, ni'u sa vakatusa talega na nodra i valavala ca na Isireli, keimami sa cakava vei kemuni: keimami sai valavala ca, koi au kei ira na mataqali ni noqu qase.

⁷ Keimami sa cakacaka vakasisila sara vei kemuni, ka sega ni vakabauta nai vakaro, se nai lesilesi, se na lewa, ko ni a vakarota vei Mosese na nomuni tamata.

⁸ Mo ni nanuma mada na vosa ko ni a vakarota vei Mosese na nomuni talatala, ni kemuni a kaya, Kevaka dou sa talaidredre, au na dui vakasevi kemudou yadua ki na veimatanitu:

⁹ ia kevaka dou na lesu mai vei au, ka vakabauta na noqu i vakaro, ka cakava; kevaka sa vakasevi tani eso vei kemudou ki nai yalayala kei vuravura, au na vakasoqoni ira mai kina, ka kauti ira ki na yasana ka'u sa digitaka me vakatikora kina na yacaqu.

¹⁰ Ia ko ira oqo era nomuni tamata kei na lewe ni nomuni matanitu, ko ni a vakabula e na nomuni kaukauwa levu, kei na ligamuni kaukauwa.

¹¹ Kemuni na turaga, me vakarorogo mada na daligamuni ki na noqu masumasu na nomuni tamata, kei na nodra masumasu na nomuni tamata, ko ira era via rerevaka na yacamuni: ia mo ni vakayacora mada na ka e cakava na nomuni tamata e na siga oqo, ka mo ni vakayacora me lomani au na tamata oqo. Ni ka'u sa dautu na mena na tui.