Neumi 3 - Vakavakadewa Makawa

Sa rusa vakaca sara ko Ninive.

¹ Ena ca na koro dauvakadave dra! na koro ka sinai sara e na veivakaisini, kei nai valavala vakasausa; sa sega ni mudu na daukovekove;

² a rorogo ni kuita, kei na vadugu ni yava ni qiqi-ni-valu, kei na ose e butubutu, kei na qiqi-ni-valu e ladelade tiko;

³ na tamata e vodo ose tiko, kei nai seleiwau e makualiliva, kei na moto e veitibiyaki, kei na kedra lewe vuqa era vuetaki; ka dua nai binibini era moku mate; ia sa sega ni wili rawa na mate; era tarabe tu e na yagodra:

⁴ ni sa ka levu na nona dautagane na yalewa matavinaka sa dautagane, na marama daucaka-mana lasu, ka dauvolitaka na veimatanitu e na nona dautagane, kei na veimataqali e na nona caka mana lasu.

⁵ Raica, koi au ka'u sa nomu meca, sa kaya ko Jiova ni lewe vuqa; ia ka'u na cega cake na nomu i sulu ki matamu, ka vakaraitaka na nomu luvawale ki na veivanua, kei na nomu veivakamaduataki ki na veimatanitu.

⁶ Ia ka'u na viritaka vei iko na ka vakasisila, ka cakava mo vakasisilataki, ka vakasesevotuni iko.

⁷ Ia ko ira kece era raici iko era na drotaki iko, ka kaya, Sa rusa ko Ninive: ko cei me na tagicaki iko? me'u qarai ira maivei era na mai vakacegui iko?

⁸ Sa vinaka li ko iko ka ca ko Noamoni, o koya ka koto e na maliwa ni veiuciwai, a wai ga ka volita, a nonai keli na uciwai, ka sa kena bai na wai?

⁹ Ko Iciopea, kei Ijipita sa nona kaukauwa, ka sega ni wili rawa; ko Futi kei na kai Lupime era nomu i to.

¹⁰ Ia sa vakabobulataki ga ko koya, sa lako tani vakabobula; a luvena lalai talega sa ra botobotolaki e na mua ni sala ni koro kecega: ia na nona tamata rogo sa ra vakawiri madigi kina, kei ira kece na nona tamata turaga sa ra vesuki e na sinucodo.

¹¹ O iko talega ko na mateni, ko na vunitaki; ko iko talega ko na qara e dua nai drodro mai na meca.

¹² A nomu koro ni valu kecega ena vaka na vu ni lolo sa vuavuai taumada: ke sa kurei, sa na lutu sara ki gusu i koya sa viakania.

¹³ Raica, ko ira na nomu tamata e na nomu vanua sa ra yalewa ga, ena dolavi sara na matamata-ni-koro ni nomu vanua vei ira na nomu meca; ena kania na nomu bai na bukawaqa.

¹⁴ Mo la'ki takiva na memu wai, me ganita ni sa buku na druadrua ni koro; vakaukauwataka na nomu bai ni valu: lako ki na tete, ka butuka na qele dregadregata, gumatuataka na lovo ni vatu-buli.

¹⁵ Ia na bukawaqa maikea ena kati iko ena muduki iko tani nai seleiwau, ena kani iko sara me vaka na vodre dramidrami: dou lewe vuqa mai me vaka na vodre dramidrami, dou lewe vuqa mai me vaka na vodre.

¹⁶ O sa vakalewevuqataki ira na nomu dauveivoli me ra lewe vuqa cake ka lailai na kalokalo ni lomalagi: na vodre dramidrami sa kabuacara mai, sa ra kaboasese tale.

¹⁷ A nomu turaga era sa vaka na vodre, kei ira na nomu kapiteni era sa vaka na qele ni vodre lelevu, e tiko e na bai bula e na siga liliwa: ni sa cadra mai na mata-ni-siga sa qai dro, ka sa sega ni kilai na yasana sa tiko kina.

¹⁸ Sa ra moce na nomu i vakatawa, na tui Asiria: sa ra koto sobu na nomu tamata qaqa: sa ra dui vakasevi ko ira na nomu tamata ki na veiulu-ni-vanua, ka sa sega e dua me vakasoqoni tale rawa.

¹⁹ Sa sega ni malumu rawa na nomu ramusu; sa ka rarawa na nomu vue: o ira kece era rogoca na kemui rogorogo era na cobo e na vukumu: ni ko cei li ka sega ni yaco tiko kina na nomu ca?