Neumi 2 - Vakavakadewa Makawa

Ai valu ni Kalou e rerevaki ka daugumatua vei Ninive.

¹ Sa lako cake mai kivei iko ko koya na dauveivakarusai: vakatawa na koro vakabai, yadrava na sala, vauca matua na tolomu, vakaukauwataki iko mo kaukauwa sara.

² Ni sa vakasuka mai ko Jiova na nodra lagilagi na Jekope, me vaka na nodra lagilagi na Isireli: ni ra a vakacacani ira ko ira na dauvakacaca, ka ra sa vakarusa na taba ni nodra vaini.

³ Sa vakadamudamutaki nai sasabai ni nona tamata qaqa, era sa vakaisulu e nai sulu kulakula ko ira na tamata i valu; sa vakaiyaragi e nai sele-takelo makumakualiliva e na qiqi-ni-valu e na siga sa vakarau kina ko koya, ia na moto ena kabei vakaidina.

⁴ Sa lako vakaivalu tu na qiqi-ni-valu e na gaunisala, sa veiciciyaki e na salatu: sa ra na rairai vaka na cina, sa vaka na liva na kedra cici.

⁵ Sa nanumi ira mai ko koya na nona qaqa: era sa toqi tu e na nodra lako: sa ra kusarawa yani ki na bai ni koro, a sa vakarautaki mai na suva.

⁶ Sa basuki mai nai sogo ni uciwai, ia na vale levu sa luvu laivi yani.

⁷ Sa vakabobulataki ko Usapi, sa kau cake yani, ia na nona vada sa ra liutaki koya ka tagi lako me vaka na ruve, ka tavia tiko na lomaseredra.

⁸ Ia ko Ninive sa vaka na drano wai mai na gauna eliu sara; ia era dro ga. Dou tu mada! Dou tu mada! era na kaci; ka na sega e rai ki muri.

⁹ Dou tokitaka na siliva, tokitaka na koula: ni sa sega ni oti rawa nai yau e bini tu, sa levu sara nai yaya domoni kecega.

¹⁰ Sa lala, sa lala didi, sa lala didi sara: ia na yalodra sa waicala, ka sa dui veiyaviti na durudra, sa yaluma kece sara talega na tolodra, ia sa ceacea sara na matadra kecega.

¹¹ Sa evei na nodra i tikotiko na laioni, kei na nodra i kanakana na luve ni laioni, na yasana ka lako voli kina na laioni, na laioni yalewa, kei na luve ni laioni, ka sa sega e dua me vakarerea?

¹² Na laioni, ka daudresulaka na kedra na luvena, ka cova na kedra na nona laioni yalewa, ka vakasinaita na nodra qara e na ka sa dresulaka, kei na nodra i kotokoto e na ka e cova.

¹³ Raica, koi au na nomu meca, sa kaya ko Jiova ni lewe vuqa, ia ka'u na vakama na nona qiqi-ni-valu me kubou; ia ena kani ira na nomu luve ni laioni, nai seleiwau: ka'u na muduka tani talega mai vanua na ka ko sa dresulaka, ena sega talega ni rogoci tale na domodra na nomu i talaki.