NA SAME 99 - Vakavakadewa Makawa

Me dokai ko Jiova, ni sa cecere ko koya.

¹ Sa lewa ko Jiova; me ra sautaninini na veimatanitu: Sa tiko e na maliwa ni Jerupi; me veitosoyaki ko vuravura.

² Sa levu ko Jiova mai Saioni; Ka cecere vei ira na lewe ni veimatanitu.

³ Me ra vakavinavinaka ki na yacamuni levu ka rerevaki; Sa yalosavasava ko koya.

⁴ A sa kaukauwa na tui ka sa lomana na lewa dodonu; O ni sa vakataudeitaka na ka dodonu, O ni sa vakayacora na lewa kei na cakacaka dodonu e Jekope.

⁵ Dou vakalevulevui Jiova na noda Kalou, Ka cuva ki nai tutu-ni-yavana; Sa yalosavasava ko koya.

⁶ O Mosese kei Eroni vei ira na nona bete, Kei Samuela vei ira era masuta na yacana; Era sa masuti Jiova, a sa vakarorogo vei ira ko koya.

⁷ Sa vosa vei ira ko koya e na duru o: Era sa vakabauta na nona vunau, kei nai lesilesi sa solia vei ira.

⁸ O ni a vakarorogo vei ira, Jiova, na neimami Kalou: Oi kemuni na Kalou ko ni sa daulomadonu ga, Ia ko ni a sauma talega na nodra i valavala.

⁹ Dou vakalevulevui Jiova na noda Kalou, Ka cuva mai na nona ulu-ni-vanua tabu; Ni sa yalosavasava ko Jiova na noda Kalou.