NA SAME 97 - Vakavakadewa Makawa

Me dokai ko Jiova, 1-6. Sa rusa ko ira era qarava na matakau, 7-9. Me da lomana na Turaga, 10-12.

¹ Sa lewa ko Jiova; me reki ko vuravura; Me marau kina na veiyanuyanu e vuqa.

² Sa vakavolivoliti koya na o kei na butobuto: Na yavu ni nonai tikotiko vakaturaga na yalododonu kei na lewa dodonu.

³ Sa liu yani vei koya na bukawaqa, Ka sa vakamai ira na nona meca era vakavolivoliti koya.

⁴ Sa vakararamataki vuravura na nona livaliva: Sa raica ko vuravura, ka sautaninini.

⁵ Sa waicala na veiulu-ni-vanua e na mata i Jiova, E na matai koya na Turaga kei vuravura taucoko.

⁶ Sa vakatakila na nona yalododonu na lomalagi, Ka ra sa raica na nonai ukuuku na veimataqali kecega.

⁷ Me ra vakamaduataki ko ira kecega era sa qarava na matakau ceuceu, O ira sa daudokai ira e na matakau: Dou cuva vua, na kalou kecega.

⁸ Sa rogoca ko Saioni, ka sa reki kina; Ka ra sa ladelade na goneyalewa ni Juta, E na vuku ni nomuni lewa, Jiova.

⁹ Ni kemuni sa cecere sara, Jiova, ki vuravura kecega: O ni sa levu sara ka lailai na kalou kecega.

¹⁰ Oi kemudou sa lomani Jiova, dou cata na ka ca: Sa maroroya ko koya na yalodra na nona tamata yalododonu; Sa vakabulai ira mai na liga ni tamata ca.

¹¹ Sa kaburaki na rarama me nodra na caka dodonu, Kei na marau me nodra sa dodonu na lomadra.

¹² Dou rekitaki Jiova, koi kemudou na yalododonu; Ka vakavinavinaka ni dou sa nanuma na nona yalosavasava.