NA SAME 96 - Vakavakadewa Makawa

Sa vakarota na vakavinavinaka vua na Kalou, o koya me da doka.

¹ Dou seretaka vei Jiova na sere vou: Dou sere vei Jiova na vuravura kecega.

² Dou sere vei Jiova, dou vakavinavinaka ki na yacana; Dou tukuna voli e na veisiga kece ni sa dauia na veivakabulai ko koya.

³ Dou tukuna na nona lagilagi ki na veimatanitu, Na nona cakacaka mana vei ira na veimataqali kecega.

⁴ Ni sa levu ko Jiova, ka sa dodonu me vakavinavinakataki vakalevu: Me rerevaki vakalevu talega ka vakalailai na kalou kecega.

⁵ Ni ra sa matakau walega na nodra kalou na veimatanitu: Ia ko Jiova ga sa bulia na lomalagi.

⁶ A vakarokoroko kei na ka vakaturaga sa tiko e matana: A kaukauwa kei na lagilagi sa tiko e nona vale tabu.

⁷ Dou ia vei Jiova, koi kemudou na veimataqali tamata, Dou ia vei Jiova na vakarokoroko kei na kaukauwa.

⁸ Dou ia vei Jiova na vakarokoroko sa kilikili kei na yacana: Dou kauta mai nai madrali ka curu ki na nona lomanibai.

⁹ Dou lotu vei Jiova e na nona vale tabu sa savasava: Dou rere e matana, na vuravura kecega.

¹⁰ Dou kaya ki na veimatanitu, Sa lewa ko Jiova: Ena vakataudeitaki talega ko vuravura me sega ni yavala rawa; Ena lewai ira vakadodonu na lewe ni veivanua.

¹¹ Me reki ko lomalagi, ka ladelade ko vuravura; Me vadugu na wasawasa, kei na ka kecega sa sinai kina.

¹² Me reki na veiwere, kei na ka kecega sa tiko kina: Ena qai marau na kau kecega mai na veikau

¹³ E na mata i Jiova; ni sa lako mai ko koya, Ni sa lako mai me lewai vuravura: Ena lewai vuravura e na yalododonu, Kei na veimatanitu e na nona lomadina.