NA SAME 95 - Vakavakadewa Makawa

Sa vakarota na vakavinavinaka vua na Kalou levu ka loloma.

¹ Tou mai sere vei Jiova; Tou mai ia na meke vua na uluvatu ni noda bula.

² Tou lako mada vua ni da vakavinavinaka, Ka reki ni da mai ia vua na same.

³ Ni sa Kalou levu ko Jiova, Ka sa Tui levu vei ira na kalou kecega.

⁴ Sa tiko e ligana na vanua titobu kei vuravura; Ka sa nona talega na veiulu-ni-vanua cecere.

⁵ Sa nona na wasawasa, ni sa bulia ko koya: Ka sa bulia na vanua mamaca na ligana.

⁶ Tou mai lotu ka cuva sobu: Tou mai vakatekiduru e na mata i Jiova, o koya ka buli keda.

⁷ Ni sa noda Kalou ko koya, Koi keda na tamata ni nona vanua, kei na sipi sa tubera ko koya. E na siga edaidai kevaka dou sa via rogoca na domona,

⁸ Dou kakua ni vakaukauwataka na yalomudou, me vaka e na veivakacudrui, Me vaka e na siga ni dauvere mai na lekutu:

⁹ Era na dauveretaki au kina ko ira na nomudou qase Ka vakatovolei au vakaca, ni ra sa raica tiko na noqu cakacaka.

¹⁰ E vasagavulu na yabaki ka'u a rarawa kina vei ira nai tabatamata ko ya, Ka kaya, Era tamata e daulako sese na lomadra, Ka ra sa sega ni kila na noqu i valavala:

¹¹ Ia ka'u a bubului kina vei ira e na noqu cudru Ni ra na sega ni curu ki na noqu i vakavakacegu.