NA SAME 94 - Vakavakadewa Makawa

Sa tagi vua na Kalou e na vuku ni valavala ni tamata ca, 1-7. Sa kilai ira na Kalou, ena cudruvi ira talega, 8-11. Era na kalougata ko ira sa vakanakuitataki ira na Kalou, 12-15. Ena totaki ira na nona ko Jiova, 16-23.

¹ I Jiova na Kalou, sa nomuni tavi na veisaumi; Na Kalou, sa nomuni na veisaumi, mo ni vakatakilai kemuni mai.

² Mo ni vakalevui kemuni oi kemuni ka dau lewai vuravura: Mo ni saumi ira mada na viavialevu.

³ A cava na kena dede, Kemuni Jiova, ni ra reki tiko nai valavala ca? Ia ka cava na kena dede ni ra reki tiko nai valavala ca?

⁴ Era cavuta ka vosataka tiko na ka rarawa? Era dokadokai ira tiko ko ira kecega nai valavala ca?

⁵ Era sa tukilaka, Jiova, na nomuni tamata, Ka vakararawataka na nomuni votavota.

⁶ Era sa vakamatea na yada kei na vulagi, Ka labati ira na gone e sega ni vakatamani.

⁷ Era sa kaya ga, Ena sega ni raica ko Jiova, Ena sega ni nanuma na Kalou i Jekope.

⁸ Dou yalomatua mai na yalovakamanumanu vei ira na tamata; Ia dou na vuku ninaica, koi kemudou na lialia?

⁹ O koya sa tea na daligada, ena sega beka ni rogo rawa? O koya sa bulia na matada, ena sega beka ni rai rawa?

¹⁰ O koya sa vunauci ira na veimatanitu, ena sega beka ni vunauci kemudou? O koya sa vakavulica na tamata me kila ka, ena sega beka ni kila ka ko koya?

¹¹ Sa kila ko Jiova na ka e vakanananu kina na tamata, Ni sa ka walega.

¹² Sa kalougata, Jiova, na tamata ko ni sa vunauca, Ka vakavulici koya e na nomuni vunau;

¹³ Mo ni vakacegui koya kina mai na siga ni rarawa, Ka me keli mada eliu na kedrai bulubulu nai valavala ca.

¹⁴ Ni na sega ni biuta na nona tamata ko Jiova, Ka na sega ni laivi ira na nonai votavota.

¹⁵ Ia ena vuki na lewa me dodonu; A ra na muria ko ira kecega na yalododonu.

¹⁶ O cei ena tu cake mai me totaki au me'u vorati ira nai valavala ca? O cei ena tu mai me vukei au me'u vorati ira na caka cala?

¹⁷ Kevaka sa sega ni noqu i vukevuke ko Jiova, Sa voleka ni tiko vagagalu na yaloqu.

¹⁸ Ni'u a kaya, Sa tidara na yavaqu; Sa qai tokoni au, Jiova, na nomuni loloma.

¹⁹ Ni sa rui levu na noqu nanuma sa leqa kina na lomaqu, Sa vakamarautaka na yaloqu na nomuni dauveivakacegui.

²⁰ Ena dua vata li kei kemuni nai tikotiko vakaturaga ni valavala ca, O koya sa vakayacora na ka ca e na lawa?

²¹ Era sa soqoni ira vata me ra vakacacana na yalona na yalododonu, Ka vakacala na tamata sa sega ni cala.

²² Ia sa noqu i drodro ko Jiova; Kei na noqu Kalou na uluvatu ka'u sa vakaruru kina.

²³ Ia ena vakayacora vei ira na nodra cala, Ka muduki ira e na nodra ca; Io, ena muduki ira laivi ko Jiova na noda Kalou.