NA SAME 92 - Vakavakadewa Makawa

A ka vinaka na vakavinavinaka vua na Kalou, 1-4. A ka levu na nona cakacaka, kei na nona lewa, 5-8. Era na cudruvi na tamata ca, ka ra na vinaka tiko na tamata dodonu, 9-15.

¹ A ka vinaka me ia na vakamolimoli vei Jiova, Ka me serevaka na vakavinavinaka ki na yacamuni, oi kemuni sa Cecere sara:

² Me dautukuna na nomuni yalololoma e na mataka, Kei na nomuni lomadina e na veibogi,

³ E nai qiriqiri e tini na kena wa, kei na soliteri; Kei na api e domo vinaka.

⁴ Ni kemuni sa vakamarautaki au, Jiova, e na nomuni cakacaka: Au na rekitaka na cakacaka ni ligamuni.

⁵ I Jiova, a ka levu na nomuni cakacaka! A ka titobu na nanuma ni lomamuni.

⁶ A tamata yalovakamanumanu sa sega ni kila; Kei na tamata lialia sa sega ni vuku rawa e na ka oqo.

⁷ Ni ra sa tubu me vaka na co ko ira nai valavala ca, Ka sa bulabula na daucaka ca; Sa ka ga me ra kawaboko laivi:

⁸ Ia koi kemuni Jiova, sa Cecere sara ka sega ni mudu.

⁹ Ni ra na rusa laivi vakaidina, Jiova, ko ira na nomuni meca; Ia ko ira dina na nomuni meca; Era na dui vakasevi tani ko ira kecega na daucaka ca.

¹⁰ Ia na noqu i leu ko na laveta cake me vaka nai leu ni iunikoni: Au na lumuti e na waiwai vou.

¹¹ Ia ena raici ira na noqu meca na mataqu, Ka rogoca na daligaqu ni ra rusa na tamata i valavala ca era tu cake me ra vakacacani au.

¹² Ena bulabula na yalododonu me vaka na balabala: Ena tubu tiko me vaka na sitari mai Lepanoni.

¹³ O ira era tei e na vale i Jiova Era na bulabula e na lomanibai ni noda Kalou.

¹⁴ Era na vuavua tiko ni ra sa qase mai; Era na drokadroka ka bulabula;

¹⁵ Me vakatakila ni sa yalododonu ko Jiova: A noqu uluvatu ko koya, ka sa sega vua na caka cala.