NA SAME 91 - Vakavakadewa Makawa

O ira na yalododonu, era sa maroroi vinaka e na vuku ni ra vakararavi tiko vua na Kalou.

¹ O koya sa tiko e na nona yasana vuni ko Koya na Cecere sara, Ena tiko ga e na yaloyalo i Koya sa Kaukauwa.

² Au na kaya e na vuku i Jiova, O koya ga na noqu i drodro kei na noqu bai ni valu: Na noqu Kalou; au na vakararavi vua.

³ Ni na vakabulai iko dina mai na nona tudai na tamata sa daubiri dai, Kei na mate ca e dauveiveitauvi.

⁴ Ena vakarurugi iko e na lawena, Ia ko na vakararavi ki na ruku ni tabana: Ena nomu i sasabai kei na nomu i vakaruru na nona yalodina.

⁵ O na sega ni rerevaka na ka e daurerevaki e na bogi, Se na gasau sa vuka voli e na siga;

⁶ Se na mate dauveiveitauvi sa lako voli e na butobuto; Se na vu ni veivakamatei sa dauia e na siga levu.

⁷ Ena bale e dua na udolu ki na ligamu i mawi, Ka tini na udolu ki na ligamu i matau; Ia ena sega ni yacovi iko.

⁸ Ko na raica wale ga e na matamu, Ka kunea nai sau ni tamata i valavala ca.

⁹ Ni ko sa kaya sa noqu i drodro ko Jiova! Ko sa vakabauti Koya na Cecere sara me nomu i tikotiko;

¹⁰ Ena sega kina ni yacovi iko e dua na ka ca, Ena sega talega ni torova na nomu vale e dua na mate dauveiveitauvi.

¹¹ Ni na vakaroti ira na nona agilose ko koya e na vukumu, Me ra maroroi iko e na nomu i lakolako kecega.

¹² Era na keveti iko e na ligadra, De sa tavutu ki na vatu na yavamu.

¹³ O na butuka na laioni kei na gata loa: Na laioni kaukauwa kei na gata ko na buturaka sara.

¹⁴ Ni sa lomani au ko koya, ka'u na vakabulai koya kina: Au na vakaceceretaki koya sara ni sa kila na yacaqu.

¹⁵ Ena tagi vei au, ia ka'u na vakarorogo vua: Au na tiko vata kaya ni sa yacovi koya na rarawa; Au na vakabulai koya ka dokai koya;

¹⁶ Au na vakamamautaki koya e na bula dede, Ka vakaraitaka vua ni'u sa vakabulai koya tiko. A Same ni Siga Tabu.