NA SAME 90 - Vakavakadewa Makawa

Sa tukuna ni sa lekaleka na bula ni tamata e na vuku ni nonai valavala ca, 1-12. Sa masuti koya na Kalou me yalololoma mai, 13-17. A masu i Mosese na tamata ni Kalou.

¹ Oi Kemuni Turaga, na neimami tikotiko, E nai tabatamata kecega.

² Ni sa bera buli na veiulu-ni-vanua, Ia ni kemuni a sega ni bulia na vuravura kei na vanua, Sai kemuni ga na Kalou e sega ni tubu ka sega ni mudu.

³ O ni sa vukica na tamata me kuvu ni soso tale; O ni sa kaya, Dou lesu tale mai, na luve ni tamata.

⁴ Ni sa tautauvata e matamuni e dua na udolu na yabaki Kei na siga e na noa ni sa oti, Kei na dua na tiki ni bogi e veivuke yadra kina.

⁵ O ni sa kauti ira tani me vaka e na dobui; era sa vaka na moce; Era sa vaka na co sa tubu e na mataka:

⁶ Sa tubu e na mataka, ka sa bulabula; Sa tamusuki e na yakavi, ka sa malai yani.

⁷ Ni keimami sa oti e na nomuni cudru, Ka sa taqaya e na nomuni cudru waqawaqa.

⁸ O ni sa tuva na neimami caka cala e matamuni, Kei na neimami cala sa vuni tu e na rarama ni matamuni.

⁹ Ni sa oti yani na neimami siga kecega e na nomuni cudru: Keimami sa vakaotia na neimami veiyabaki me vaka na vakanananu walega.

¹⁰ Na neimami veiyabaki sa vitusagavulu ga; Ia kevaka sa yabaki walusagavulu e na vuku ni kaukauwa, Sa ka ni veivakaocataki ka ka rarawa na kena via kaukauwa ko ya; Ni sa muduki tani vakasauri, keimami sa qai vuka yani.

¹¹ O cei sa kila na kaukauwa ni nomuni cudru? Se na nomuni cudru waqawaqa, me rerevaki kemuni dina kina?

¹² Mo ni vakavulici keimami me keimami wilika na neimami siga, Me keimami sa vagolea kina yalo i keimami ki na vuku.

¹³ Mo ni lesu mai, Jiova, a cava na kena dede? Ia mo ni veivutuni e na vukudra na nomuni tamata.

¹⁴ Mo ni vakamamautaki keimami e na mataka e na nomuni loloma; Me keimami reki kina ka marau e na neimami siga kecega.

¹⁵ Mo ni vakamarautaki keimami me tautauvata kei na veisiga ko ni a vakararawataki keimami kina, Kei na veiyabaki keimami a kunea kina na ca.

¹⁶ Me rairai na nomuni cakacaka kivei ira na nomuni tamata, Kei na nomuni ukuuku vei ira na luvedra.

¹⁷ Ia me cilavi keimami na serau i Jiova na neimami Kalou: Ia mo ni vakataudeitaka vei keimami na cakacaka ni liga i keimami; Io, na cakacaka ni liga i keimami mo ni vakataudeitaka.