NA SAME 9 - Vakavakadewa Makawa

A vakavinavinaka kei na vakabauta ni tamata yalododonu sa tiko vakararawa. Vua na Domo-ni-sere e na Muce-lapeni. A Same i Tevita.

¹ Au na vakavinavinaka vei Jiova e na yaloqu taucoko; Au na tukuna kecega na nomuni cakacaka e veivakurabuitaki.

² Au na reki ka marautaki kemuni: Au na seretaka na yacamuni, oi kemuni sa Cecere sara.

³ Ni ra sa dro tani na noqu meca, Era na bale ka rusa mai na matamuni.

⁴ Ni kemuni sa totaka e na vukuqu na ka dodonu kei na lewa; O ni sa tiko e nai tikotiko vakaturaga, ka sa ia na lewa dodonu.

⁵ O ni sa vunauci ira na veimatanitu, ko ni sa vakarusa na tamata ca; Ko ni sa bokoca laivi sara na yacadra ka sega ni mudu.

⁶ Ko iko na meca, sa mudu sara na veivakarusai: Ko ni a vaqeavutaka na veikoro; Sa takali vata kei ira na nodra vakananumi.

⁷ Ia ko Jiova, ena tu dei ga ka sega ni mudu; Sa vakarautaka ko koya na nonai tikotiko me ia na veilewai.

⁸ Ena lewa na vuravura ko koya e na lewa dodonu, Ena lewai ira na lewe ni veivanua e na yalododonu sara.

⁹ Ena yaco ko Jiova me nona uluvatu ko koya sa vakararawataki, Na uluvatu e na gauna ni veivakacacani.

¹⁰ Era na vakararavi talega vei kemuni ko ira era sa kila na yacamuni, Ko ni sa sega ni biuti ira era sa vakasaqarai kemuni, Jiova.

¹¹ Dou sere vei Jiova, vei koya sa tiko mai Saioni: Tukuna vei ira na tamata na nona cakacaka.

¹² Ni sa taroga ko koya nai sau ni dra, sa nanumi ira: Sa sega ni guilecava na nodra tagi era sa yalomalumalumu.

¹³ I Jiova, mo ni yalololoma mai vei au; Mo ni raica na ka rarawa sa yaco vei au maivei ira era sa cati au, Oi kemuni ka kauti au cake mai na matamata-ni-koro ni mate:

¹⁴ Me'u tukuna kina na ka kecega ko ni sa vakacaucautaki kina E na matamata-ni-koro ni goneyalewa ni Saioni: Au na reki ni kemuni sa ia na veivakabulai.

¹⁵ Sa sikalutu na veimatanitu ki nai keli era kelia: E na lawa era sa vunia sa coriti kina na yavadra.

¹⁶ Sa kilai ko Jiova e na lewa sa kitaka ko koya; Sa coriti na tamata ca e na cakacaka ni ligana. Sela.

¹⁷ Ena vakasevi ki eli ko ira na tamata ca, Kei ira na lewe ni veivanua kecega era sa guilecava na Kalou.

¹⁸ Ni na sega ni guilecavi tikoga na tamata dravudravua: Ena sega ni rusa laivi na ka era nuitaka na tamata yalomalumalumu.

¹⁹ I Jiova, ni tu cake; me kakua ni gumatua na tamata: Me ra lewai e matamuni ko ira na veimatanitu.

²⁰ I Jiova, mo ni vakarerei ira; Me ra kilai ira na lewe ni veivanua ni ra sa tamata walega. Sela.