NA SAME 88 - Vakavakadewa Makawa

A tagi vua na Kalou e na vuku ni rarawa levu. A Same na nodra na luve i Kora. Vua na Domo-ni-sere e na Maalaca Leanoca, a Masikili i Imani na Eseraaiti.

¹ Kemuni Jiova na Kalou sa dauvakabulai au, Ka'u a tagi e na siga kei na bogi e matamuni:

² Me rairai e matamuni na noqu masu: Mo ni vakalakala daligamuni ki na noqu tagi;

³ Ni sa luvu na lomaqu e na ka rarawa: Ia ka'u sa toro voleka ki nai bulubulu.

⁴ Au sa wili vata kei ira era sa lako sobu ki nai bulubulu: Au sa vaka na tamata sa sega vua na kaukauwa:

⁵ Sa biu tu kei ira na mate, Me vakataki ira na moku era sa koto e nai bulubulu, O ira ko ni sa sega ni nanuma tiko: A ra sa tawase tani mai na ligamuni.

⁶ O sa virikotori au ki nai keli titobu sara, E na vanua butobuto, e loma ni wai titobu.

⁷ Sa bitaki au na nomuni cudru, Ia ko ni sa vakararawataki au ni sa sevi au na nomuni biau kecega. Sela.

⁸ O sa vakayawataka vei au na wekaqu; O sa soli au me'u sevaki vei ira: Au sa sogolati, ka sega ni lako tani rawa.

⁹ Sa tagi na mataqu e na vuku ni rarawa: I Jiova, ka'u a tagi vei kemuni e na veisiga kecega, Ka'u sa dodoka yani na ligaqu vei kemuni.

¹⁰ Ko ni na cakava li na ka mana e na vukudra na mate? Ena tu cake li na mate ka vakavinavinaka vei kemuni? Sela.

¹¹ Ena tukuni li na nomuni yalololoma e nai bulubulu? Se na nomuni yalodina e na Rusa?

¹² Ena kilai li na nomuni cakacaka mana mai na vanua butobuto? Se na nomuni cakacaka dodonu mai na vanua e dauguileca kina na ka?

¹³ Ia koi au ka'u sa tagi oti vei kemuni Jiova; Ia ena yaco kivei kemuni e na mataka na noqu masu.

¹⁴ I Jiova, a cava ko ni sa biuta tani kina yaloqu? A cava ko ni sa vunia kina vei au na matamuni?

¹⁵ Oi au ka'u sa vakararawataki ka voleka ni mate ni'u sa cauravou ka yacova na siga oqo: Au sa domobula ni sa bitaki au na ka rerevaki maivei kemuni.

¹⁶ Sa luvuci au na nomuni cudru waqawaqa; Sa muduki au tani na nomuni veivakarerei.

¹⁷ Sa vakavolivoliti au e na veisiga kecega me vaka na wai; Sa lako vata mai ka voliti au.

¹⁸ O sa vakayawataka vei au na wekaqu kei koya sa lomani au, Ka kauti ira ki na butobuto keitou sa dauveikilaki.