NA SAME 83 - Vakavakadewa Makawa

E na nona masu sa tukuna vua na Kalou na nodra vere na meca, 1-8; ka masuta na Kalou me cudruvi ira, 9-18. A Same i Esafa.

¹ Mo ni kakua ni galu, na Kalou: Mo ni kakua ni tiko lo, mo ni kakua ni tiko wale, na Kalou.

² Raica, era sa ue na nomuni meca: Ka ra sa viavialevu ko ira era sa cati kemuni.

³ Era sa buki kedra vere na nomuni tamata, Ka bose vakaca e na vukudra na tamata ko ni sa vakaruruga.

⁴ Era sa kaya, Me da mai vakawabokotaki ira me ra kakua ni matanitu tiko; Me kakua ni nanumi tale na yaca i Isireli.

⁵ Ni ra sa lomavata me ra bose vata: Era sa tovata me ra bukia na kemuni vere:

⁶ Na veivale i Itomi kei Isimeli; Kei Moapi kei ira na Akiri;

⁷ Kei Kipali, kei Amoni, kei Amaleki; Na kai Filisitia kei ira na kai Taia;

⁸ Sa dua vata talega kei ira ko Asiria: Era sa vukea na luve i Loti. Sela.

⁹ Mo ni cakacaka vei ira me vaka vei ira na kai Mitiani; Me vaka vei Sisira, kei Japini, mai na uciwai ko Kisoni:

¹⁰ Era a rusa mai Edoa: Ka ra sa yaco me vaka na de ni manumanu e na vanua.

¹¹ Mo ni cakava na nodra turaga me ra vakataki Orepi, kei Siepi: Ia na nodra turaga kecega me vakataki Sepa kei Salimuna:

¹² O iratou ka kaya, Tou rawata me nodatou Na veivale ni Kalou.

¹³ Noqu Kalou, mo ni cakavi ira me ra vaka na covulaca; Me ra vaka na vu-ni-sila e na mata ni cagi.

¹⁴ Me vaka sa tavuna na veikau na bukawaqa, Ka sa vakacaudreva na veiulu-ni-vanua na yameyame ni bukawaqa;

¹⁵ Mo ni vakacacani ira vakakina e na nomuni cava, Ka vakadomobulataki ira e na nomuni cava levu.

¹⁶ Mo ni vakamaduataka vakalevu na matadra; Me ra qarava kina na yacamuni, Jiova.

¹⁷ Me ra vakamaduataki ka taqaya tikoga; Ia me ra vakamaduataki, ka kawaboko:

¹⁸ Me ra kila ko ira na tamata ni sai kemuni na yacamuni ga ko JIOVA, Sa Cecere sara duaduaga e vuravura taucoko.