NA SAME 81 - Vakavakadewa Makawa

Sa masuti ira na tamata me ra vakavinavinaka vei Jiova, 1-5. Sa vakaroti ira ko Jiova me ra talairawarawa, 6-16. Vua na Domo-ni-Sere e na Kitica. A Same i Esafa.

¹ Dou sere vakadomoilevu vua na Kalou na noda kaukauwa: Dou reki vakadomoilevu vua na Kalou i Jekope.

² Lagata na same, ka kauta mai na tibereli, Kei na api domo vinaka kei na soliteri.

³ Uvuca na davui e na vula vou, E na gauna sa loku, e na siga ni noda solevu.

⁴ Ni sa lesi na ka oqo vei ira na Isireli, A vunau mai vua na Kalou i Jekope.

⁵ Sa cakava na ka oqo mei vakadinadina vei ira na Josefa, Ni sa lako tani voli mai na vanua ko Ijipita: Na vanua ka'u a rogoca kina na vosa ka'u a sega ni kila.

⁶ Au a laveta tani nai colacola mai na tabana: Kei na ligana sa sereki mai na kuro.

⁷ O a tagi ni ko a rarawa, ia ka'u a vakabulai iko; Au a vosa vei iko mai na yasana vuni ni kurukuru: Au a vakatovolei iko mai na wai mai Meripa. Sela.

⁸ Dou vakarorogo, na noqu tamata, ka'u na tukutuku vei iko: I Isireli, kevaka ko na vakarorogo vei au;

⁹ Ena sega na Kalou tani me tiko kei iko; Ia mo kakua ni cuva ki na Kalou ni kai tani.

¹⁰ Oi au ko Jiova na nomu Kalou, Ka kauti iko tani mai na vanua ko Ijipita: Mo dalaga vakalevu, ia ka'u na vakamamautaki iko.

¹¹ Ia na noqu tamata, era sa sega ni via rogoca na domoqu; Ka sa sega ni vinakati au ko ira na Isireli.

¹² Ia ka'u a biuti ira me ra muria na nodra yalokaukauwa: Ka ra sa muria na nodra lewa.

¹³ Ke ra sa vakarorogo mada vei au ko ira na noqu tamata, Ka muria ga na noqu sala ko ira na Isireli:

¹⁴ Ka'u a qai vakamalumalumutaki ira vakusakusa na nodra meca, Ka vakalesuya na ligaqu me'u veivala kei ira era sa vakararawataki ira.

¹⁵ O ira sa cati Jiova, era a qai soro vua: Ia na nodra gauna na noqu tamata, sa na qai sega ni oti rawa.

¹⁶ Ia sa na qai vakani ira ko koya e na witi vinaka sara: Ka vakamamautaki iko e na oni mai na uluvatu.