NA SAME 8 - Vakavakadewa Makawa

Na lagilagi ni Kalou e na nona cakacaka, kei na nona loloma vei ira na tamata. Vua na Domo-ni-sere e na Kitica. A Same i Tevita

¹ I Jiova na neimami Turaga, A ka talei vakaidina nai rogo ni yacamuni e vuravura taucoko! O ni sa vakaraitaka na nomuni lagilagi ni lomalagi e cake.

² Mai na gusudra na gone lalai kei na gone sa sucu tiko ko ni sa vakataudeitaka na vakavinavinaka, E na vukudra na nomuni meca: Mo ni vagalui koya kina na meca kei koya sa dauveisausaumi.

³ Ni'u sa vakananuma na nomuni lomalagi, na cakacaka ni qaqalo ni ligamuni, Na vula kei na kalokalo ko ni sa lesia;

⁴ A cava na tamata mo ni nanumi koya kina? Kei na luve ni tamata, mo ni dautalevi koya kina?

⁵ O ni sa buli koya me uasivi sobu vakalailai vei ira na agilose, Ka vakaisalataka e nai ukuuku kei na vakarokoroko.

⁶ O ni sa lesi koya me lewa na cakacaka ni ligamuni; Ko ni sa vakamalumalumutaka e ruku ni yavana na ka kecega;

⁷ Na sipi kecega kei na pulumokau, Kei na manumanu talega ni vanua;

⁸ Na manumanu vuka, kei na ika ni waitui, Kei na ka kecega sa lako voli e na sala e loma ni wasa liwa.

⁹ I Jiova na neimami Turaga, Sa ka talei vakaidina na yacamuni e vuravura taucoko!