NA SAME 79 - Vakavakadewa Makawa

Sa tagi vua na Kalou ni sa ca ko Jerusalemi, 1-4. Ka sa masuti koya me vakabulai ira, 5-13. A Same i Esafa.

¹ Kemuni na Kalou, era sa curu mai ki na nomuni vanua ko ira na kai tani; Era sa vakadukadukalitaka na nomuni vale tabu; Era sa vakacacani Jerusalemi me sa bukebuke walega.

² Era sa solia na yago mate ni nomuni tamata, me kedra na manumanu vuka, Kei na lewedra na nomuni tamata yalododonu vei ira na manumanu kei vuravura.

³ Era sa livia na kedra dra me vaka na wai ka sa voliti Jerusalemi; Ka sa sega me buluti ira.

⁴ Keimami sa rogo ca vei ira sa tiko voleka vei keimami, Ka sa vakalialiai ka dredrevaki vei ira era tiko voleka vei keimami.

⁵ Kemuni Jiova, ena vakabeka evei na kena dede? ena sega ni mudu beka na nomuni cudru? Ena waqa tiko beka na nomuni vuvu me vaka na bukawaqa?

⁶ Sovaraka yani na nomuni cudru vei ira na veimataqali era sa sega ni kilai kemuni, Vei ira talega na veimatanitu era sa sega ni masuta na yacamuni.

⁷ Ni ra sa kani Jekope oti, Ka vakacacana na nonai tikotiko.

⁸ Mo ni kakua ni nanuma na nodra caka cala na neimami qase ka cudruvi keimami kina: ia me taumada vakatotolo vei keimami na nomuni yalololoma levu: Ni keimami sa vakalolomataki vakalevu.

⁹ Kemuni na Kalou na neimami vakabula, mo ni vukei keimami, me rogo kina na yacamuni: Ka vakabulai keimami, ka bokoca na neimami valavala ca, e na vuku ni yacamuni.

¹⁰ Me ra kaya vakacava na veimatanitu, Sa evei na nodra Kalou? Me kilai vei ira na veimatanitu e na mata i keimami Ni sa cudruvaki na kedra dra na nomuni tamata sa vakadavei.

¹¹ Me yaco mada ki na matamuni na nona vutugu na tamata sa vesu; Me vaka na kaukauwa ni ligamuni mo ni vakabulai ira era sa lesi me mate;

¹² Ia mo ni sauma vakavitu vei ira na tiko voleka vei keimami, E na vuku ni nodra vosa ca, era sa vosacataki kemuni kina, na Turaga.

¹³ Ia koi keimami na nomuni tamata kei na sipi ni nomuni vanua veico, Keimami na sega ni mudu ni vakavinavinaka vei kemuni: Keimami na tukuna na ka mo ni vakavinavinakataki kina ki nai tabatamata kecega.