NA SAME 78 - Vakavakadewa Makawa

Sa kaya ni na tukuna na cakacaka ni Kalou, 1-8. A nodra i valavala na Isireli ni ra tiko mai lekutu, kei na cakacaka mana ni Kalou vei ira, 9-55. Ni ra tiko talega mai Kenani, ka yacova na gauna i Tevita, 56-72. A Masikili i Esafa.

¹ Dou vaqara daligamudou, noqu tamata, ki na noqu vunau: Dou vakalakala na daligamudou ki na vosa ni gusuqu.

² Au na dalaga na gusuqu e na vosa vakatautauvata: Au na tukuna eso na ka sa vuni tu mai na gauna makawa:

³ Ko ya keitou sa rogoca ka kila, Ka ra sa tukuna mai vei keitou ko ira na noda qase.

⁴ Keitou na sega ni vunia vei ira na luvedra, Keitou na vakatakila ki nai tabatamata emuri na nona vinaka ko Jiova, Kei na nona kaukauwa, kei na nona cakacaka mana sa kitaka ko koya.

⁵ Ni sa vakatura ko koya me dautukuni vei ira na Jekope, Ka tauca na vunau vei ira na Isireli, Ka sa vakarota vei ira na noda qase, Me ra vakatakila vei ira na luvedra:

⁶ Me ra kila rawa nai tabatamata emuri, io ko ira na gone era na sucu emuri; Me ra tubu talega ka tukuna vei ira na luvedra:

⁷ Ka me ra vakararavi ga vei koya na Kalou, Ka sega ni guilecava na cakacaka ni Kalou, Ka me ra vakabauta ga na nona vunau:

⁸ Ia me ra kakua ni vakataki ira na nodra qase, Nai tabatamata yalovakatani ka talaidredre; Nai tabatamata sa sega ni vakarautaka na lomadra, Ka sa sega ni dina vua na Kalou na yalodra.

⁹ Na Ifireimi, sa vakaiyaragi e na dakai titi, Era sa suka tale e na siga ni valu.

¹⁰ Era sega ni vakabauta na veiyalayalati kei na Kalou, Ka ra bese ni muria na nona vunau;

¹¹ A ra sa guilecava na nona cakacaka, Kei na nona cakacaka vakurabui sa vakatakila oti ko koya vei ira.

¹² A ka vakurabui sa kitaka ko koya e matadra na nodra qase, E na vanua ko Ijipita, kei na tiki ni vanua mai Soani.

¹³ Sa wasea na wasawasa ko koya, ka kauti ira eloma; Ka binia cake na wai me tu me vaka na suva levu.

¹⁴ Sa tuberi ira e na siga ko koya e na o, Kei na bogi talega e na rarama ni bukawaqa.

¹⁵ Sa tasea na veivatu mai na veikau ko koya, Ka vagunuvi ira me vaka mai na wai titobu sara.

¹⁶ Sa vakatubura talega ko koya na wai drodro mai na vatu, Ka vakadavea sobu na wai me vaka na uciwai.

¹⁷ Ia era sai valavala ca tiko vua, Ni ra vakacudrui Koya na Cecere sara mai na veikau.

¹⁸ A ra sa dauveretaki koya na Kalou e lomadra, Ni ra kerea na kakana ni ra garova.

¹⁹ A ra sa vosacataka na Kalou; Ka kaya, Sa vakarautaka rawa li na Kalou na tepeli e na veikau?

²⁰ Raica, sa yavita na vatu ko koya, ka sa vure maikina na wai, Ka sa vuabale na dreke ni wai; Sa solia rawa tale beka na madrai? Sa vakarautaka rawa beka na lewe ni manumanu vei ira na nona tamata?

²¹ Sa rogoca na ka oqo ko Jiova, ka sa cudru: Ka sa waqa kina na buka vei ira na Jekope, Sa tubu talega na cudru vei ira na Isireli;

²² Ni ra sa sega ni vakabauta na Kalou, Ka ra sega ni vakararavi vua me vakabulai ira:

²³ Ia sa vakarota oti na o maicake, Ka dolava na katuba kei lomalagi,

²⁴ Sa vakatauca na mana vei ira me ra kania, Ka sa solia vei ira na sila ni lomalagi.

²⁵ Ia na tamata, era sa kania na kedra na agilose: Ka sa solia vei ira ko koya na kakana me ra mamau sara.

²⁶ Sa vakaliwava na tokalau mai lomalagi: Ka sa kauta mai na ceva e nona kaukauwa.

²⁷ Sa vakatauca vei ira na lewe ni manumanu me vaka na kuvu-ni-soso, Kei na manumanu vuka me vaka na nuku ni matasawa:

²⁸ Ka sa tauca e na saqata ni nodra i tikotiko, Ka vakavolivolita na nodra veivale.

²⁹ A ra sa kana, ka mamau sara: Ni sa solia ko koya na ka era garova.

³⁰ Ia ka sa sega ni mudu rawa na nodra gagaro: Ia ni sa tu e gusudra na kedra kakana,

³¹ Sa yacovi ira na cudru ni Kalou, Ka vakamatei ira era sa uasivi vei ira, Ka mokuta na tamata bulabula e Isireli.

³² Ia sa oti kecega oqo, ka ra sai valavala ca tikoga, Ka sega ni vakabauta ni ra raica na nona cakacaka mana.

³³ O koya oqo sa vakaotia kina na nodra siga e na ka e sega ni yaga, Kei na nodra yabaki e na ka rarawa.

³⁴ Ni sa mokuti ira, era sa qai qarai koya: Ka ra lesu mai ka ra qara vakatotolo na Kalou.

³⁵ A ra sa nanuma ni sa nodra uluvatu na Kalou, Kei na nodra i Vakabula na Kalou Cecere sara.

³⁶ Ia era sa vosaveicavilaki vua e na gusudra, Ka lasu vua e na yamedra.

³⁷ Ni sa sega ni dodonu vua na yalodra, Ka ra sa sega ni tiko dei e na nona veiyalayalati.

³⁸ Ia ko koya, ni sa yalololoma, sa sega ni sauma na nodra i valavala ca, ka sega ni vakarusai ira: Ia sa vakalesuya tani vakavuqa na nona cudru, Ka sega ni uqeta na nona cudru me waqawaqa sara.

³⁹ Ni sa nanuma ko koya ni ra sa tamata ga; Na cagi sa lako tani, ka sega ni lesu tale mai.

⁴⁰ A ka tani na nodra talaidredre vua mai na veikau, Ka vakararawataki koya mai lekutu!

⁴¹ Io, era sa vuki tani ka vakatovolei koya vakaca na Kalou, Ka vakacudrui Koya na Yalosavasava ni Isireli.

⁴² Era sa sega ni nanuma na ligana, Se na siga sa vakabulai ira kina mai na meca.

⁴³ Ni sa kitaka ko koya nai vakadinadina mai Ijipita, Kei na nona cakacaka e veivakidacalataki e na tiki ni vanua mai Soani:

⁴⁴ Ka sa vukica na nodra uciwai me dra. Kei na nodra soniwai, me ra kakua ni gunuva rawa.

⁴⁵ Sa tala vei ira na yavusa lago e vuqa, a sa kani ira; Kei na boto, ka vakacacani ira,

⁴⁶ Ka sa solia talega na nodra vuata ki na nuve, Kei na ka era oca kina ki na vodre.

⁴⁷ Sa vakamatea na nodra veivaivaini e na uca-cevata, Kei na nodra lolo e na tegu cevata.

⁴⁸ Sa vakamatea na nodra manumanu lelevu ko koya e na uca-cevata, Kei na nodra qele ni manumanu e na livaliva.

⁴⁹ Sa vakayacora vei ira na nona cudru waqawaqa, Na lesavi, kei na yaluma, kei na ka rarawa, Ni sa tala na agilose ca vei ira.

⁵⁰ Sa carata na sala ki na nona cudru; Sa sega ni tarova na yalodra mai na mate, Ia sa solia na nodra bula ki na mate veiveitauvi;

⁵¹ Sa vakamatea na ulumatua kecega mai Ijipita; A nodra kaukauwa levu mai na veivale i Ame:

⁵² Ia sa kauti ira tani na nona tamata me vaka na sipi, Ka tuberi ira voli e na veikau me vaka na qele ni sipi.

⁵³ Sa tuberi ira vakavinaka yani, a ra sa sega kina ni rere: Ia sa dromuca na nodra meca na wasawasa.

⁵⁴ Sa kauti ira ko koya ki nai yalayala ni nona vanua tabu, Io ki na ulu-ni-vanua oqo, sa volia na ligana i matau;

⁵⁵ A sa vakaseva tani e matadra na veimatanitu, Ka sa vota vei ira na nodra veiyasana e na wa ni vakarau, Ka vakatikori ira na veimataqali ni Isireli e na nodra veivale.

⁵⁶ Ia ka ra sa vakatovolea ka vakacudruya na Kalou Cecere sara, Ka sega ni muria na nona vunau:

⁵⁷ Era sa vuki tani ga, ka cakacaka vakailasu me vaka na nodra qase: A ra sa vakatikitiki tani me vaka na dakai titi e daulasu.

⁵⁸ A ra sa vakacudrui koya e nodra veiyasana cecere, Ka vakauqeta na nona vuvu e na vuku ni nodra matakau ceuceu.

⁵⁹ Sa rogoca na Kalou, ka sa cudru sara, Ka sa vakasisilataki ira vakalevu na Isireli:

⁶⁰ A sa biuta kina na nonai tikotiko mai Sailo, Na nona vale tabu sa lesia ko koya me tiko kei ira na tamata;

⁶¹ Ka sa soli ira na nona kaukauwa me ra vakabobulataki, Kei na nonai ukuuku ki na ligana na meca.

⁶² Sa soli ira na nona tamata me ra mate e nai seleiwau; A sa cudruva na nonai votavota.

⁶³ Sa kania na nodra cauravou na bukawaqa; Ka sa sega ni musu na nodra goneyalewa me ra vakawati.

⁶⁴ Sa bale na nodra bete e nai seleiwau; A sa sega ni tagiyaso na nodra yada.

⁶⁵ Sa qai yadra mai na Turaga me vaka e dua mai na moce, Ka vaka na tamata qaqa ni sa kaila e na vuku ni waini.

⁶⁶ Sa yavita nai murimuri ni nona meca: A sa cakava me ra rogo ca tikoga.

⁶⁷ Sa bese ni tiko e na vale i Josefa, Ka sega ni digitaka na mataqali i Ifireimi:

⁶⁸ Sa digitaka ga na mataqali i Juta, Na ulu-ni-vanua ko Saioni, sa daulomana ko koya.

⁶⁹ Sa tara vakacecere na nona vale tabu, Me vakataki vuravura, sa tauyavutaka ko koya me sega ni oti rawa.

⁷⁰ Sa digitaki Tevita talega na nona tamata, Ka kauti koya mai na bai ni sipi;

⁷¹ Ni sa muria tiko na sipi sa vakasucu, Sa kauti koya me vakani ira na Jekope na nona tamata, kei ira na Isireli na nonai votavota.

⁷² Sa vakani ira me vaka na nona yalododonu; Ka tuberi ira ni sa vuku na ligana.