NA SAME 77 - Vakavakadewa Makawa

Sa tagi vua na Kalou ni sa rarawa, 1-9. Sa nanuma na cakacaka loloma ni Kalou, ka sa qai vakacegu, 10-20. Vua na Domo-ni-sere, vei ira na Jitucuni. A Same i Esafa.

¹ Au a tagi vua na Kalou e na domoqu, Io, vua na Kalou e na domoqu; ka sa vaqara daligana mai vei au.

² E na siga ka'u a rarawa kina ka'u a qarai Jiova: Sa dodo tu na ligaqu e na bogi, ka sega ni cegu: Sa bese ni vakacegui na yaloqu.

³ Au a nanuma na Kalou, ka'u sa mani rarawa: Au a vakanananu, ka sa luvu na lomaqu. Sela.

⁴ Ko ni sa bureitaka vei au na moce: Sa rarawa na yaloqu ka'u sa sega kina ni vosa rawa.

⁵ Au sa vakanananu ki na gauna makawa Kei na veiyabaki makawa sara.

⁶ Au a nanuma na noqu sere e na bogi: Au sa vakanananu e lomaqu. Ka sa vakatarotaroga na yaloqu.

⁷ Ena biuti au laivi beka na Turaga ka sega ni mudu? Ena sega beka ni yalololoma tale?

⁸ Sa takali laivi beka na nona loloma ka sega ni mudu? Sa na sega beka ni yaco tale na nona vosa ni yalayala?

⁹ Sa guilecava beka nai valavala loloma na Kalou? Sa vakadaroya beka na nona loloma levu ni sa cudru? Sela.

¹⁰ Au a qai kaya, Oqo na noqu lialia: Ia ka'u na nanuma na veiyabaki ni liga i matau i Koya sa Cecere sara.

¹¹ Au na nanuma na cakacaka i Jiova: Au na nanuma na nomuni cakacaka mana mailiu.

¹² Au na veinanuyaka talega ki na nomuni cakacaka kecega, Ka veivosakitaka na nomuni valavala.

¹³ A nomuni valavala, na Kalou, na ka savasava: O cei na Kalou levu me vakataki koya na noda Kalou?

¹⁴ Sai kemuni na Kalou sa caka mana tiko: O ni sa vakatakila oti na nomuni kaukauwa e na kedra maliwa na tamata.

¹⁵ O ni sa vakabulai ira na nomuni tamata e na ligamuni, Ia ko ira na luve i Jekope kei Josefa. Sela.

¹⁶ Sa kunei kemuni na Kalou, na wai; Sa kunei kemuni na wai, ka sa rere: Io, sa kidroa talega na wai titobu.

¹⁷ Sa livia yani na wai na o: Sa rorogo ko lomalagi: Io, sa lako voli yani na nomuni gasau.

¹⁸ A domo ni nomuni kurukuru sa rogo e na covulaca: Sa vakararamataki vuravura na livaliva: Sa sautaninini ka tavuki ko vuravura.

¹⁹ A nomuni sala sa koto e na wasawasa, Kei na nomuni salatu e na wai levu, Ka sa sega ni kilai na we ni yavamuni.

²⁰ O ni a tuberi ira na nomuni tamata me vaka na qele ni sipi. E na liga i Mosese kei Eroni.