NA SAME 76 - Vakavakadewa Makawa

Sa vakatakila ni sa rerevaki na Kalou, e na vuku ni nona cakacaka e na vukudra na nona lewe ni lotu. Vua na Domo-ni-sere e na Nikinoca. A Same i Esafa.

¹ Sa kilai e Juta na Kalou: Sa levu na yacana mai Isireli.

² Ia sa tu mai Selemi na nona vale, Kei na nonai tikotiko mai Saioni.

³ Sa musuka maikina ko koya na gasau ni dakai, Nai sasabai, kei nai seleiwau, kei nai valu. Sela.

⁴ Oi kemuni ko ni sa rogo, ka ko ni sa levu vakaidina, mai na veiulu-ni-vanua ni dauivalavala vakaukauwa.

⁵ Sa kau tani na nodra i toki ni valu na qaqa, era sa moce lutu: Ka sa sega vei ira na kaukauwa era sa kunea na ligadra.

⁶ Ni kemuni a vunauca, na Kalou i Jekope, Sa moce lutu sara ko ira e na qiqi-ni-valu, kei ira sa vodo ose.

⁷ Oi kemuni, io, sai kemuni ga, sa rerevaki: O cei sa tu rawa e matamuni ni kemuni sa cudru mai?

⁸ O ni sa vakarogorogotaka mai na nomuni lewa mai lomalagi; Sa rere ko vuravura, ka sa tiko lo,

⁹ Ni sa tu cake na Kalou me lewa, Me vakabulai ira kecega era sa yalomalua e vuravura. Sela.

¹⁰ Na cudru ni tamata sai koya kemuni na dokai dina kina: Ia na kena vo ni cudru ko ni na vakadaroya.

¹¹ Dou bubului, ka vakayacora talega vei Jiova na nomudou Kalou: O ira kecega era tiko vakavolivoliti koya, me ra kauta mai na ka ni loloma vua sa dodonu me rerevaki.

¹² Ena vakawaicalataka ko koya na lomadra na turaga: Sa rerevaki ko koya vei ira na tui kei vuravura.