NA SAME 74 - Vakavakadewa Makawa

Sa tagi vua na Kalou ni sa ca na nona tamata, kei na nona vale tabu, e na vuku ni meca, 1-9. Sa masuta na Kalou me vakabulai ira, 10-23. A Masikili i Esafa.

¹ Kemuni, na Kalou, a cava ko ni sa biuti keimami laivi kina ka sega ni mudu? A cava e kubou kina na nomuni cudru vei ira na sipi ni nomuni vanua veico?

² Mo ni nanumi ira na nomuni soqosoqo, ko ni a volia eliu; Na mataqali ni nomuni vanua, ko ni a vakabula; Na ulu-ni-vanua ko Saioni oqo, ko ni a dautiko kina.

³ Me kusarawa mai na yavamuni ki na veivakarusai sa sega ni mudu; Ki na ka kecega sa vakacacana na meca e nomuni vale tabu.

⁴ Era sa qoqolou na nomuni meca e na kedra maliwa na nomuni soqosoqo; Era sa vakaduria na nodra i vakatakilakila mei vakatakilakila.

⁵ Sa rogo eliu na tamata ni sa laveta Na matau me dauta kau lelevu.

⁶ Ia oqo, na cakacaka sa ceuti Era sa qai basuka sobu vata e na matau kei nai tukituki.

⁷ Era sa vakama na nomuni vale tabu e na bukawaqa, Era sa vakacacana nai tikotiko ni yacamuni ni ra sa talaraka sobu ki na qele.

⁸ Era sa kaya e lomadra, Me da vakarusai ira vata: Era sa vakama oti na veivale ni lotu kecega ni Kalou e na vanua.

⁹ Keimami sa sega ni raica tiko na neimami vakatakilakila: Sa sega tale e dua na parofita: Ka sa sega e dua vei keimami e kila se na vakaevei na kena dede.

¹⁰ A cava na kena dede, na Kalou, ni na vosa ca tiko na meca? Ena sega beka ni mudu na nodra vosacataka tiko na yacamuni na meca?

¹¹ A cava ko ni sa vakasuka tale kina na ligamuni, io, na ligamuni matau? Mo ni cavuta tale mai na lomaseremuni ka vakarusai ira.

¹² Ia na Kalou sa noqu Tui mailiu, Sa ia tiko na veivakabulai e vuravura.

¹³ O ni a wasea na wasawasa e nomuni kaukauwa: O ni a bola na uludra na tavuto e loma ni wai.

¹⁴ O ni a bola vakalalai na ulu i livaiacani, Ka solia me kedra kakana era tiko mai veikau.

¹⁵ O ni a wasea na mataniwai kei na uciwai: O ni a vakadiva na uciwai sa drodro vakaukauwa.

¹⁶ Sa nomuni na siga, ka sa nomuni talega na bogi: O ni a vakarautaka na rarama kei na mata-ni-siga.

¹⁷ O ni a lesia nai yalayala kecega kei vuravura: O ni a lesia na vula i katakata kei na vula i liliwa.

¹⁸ I Jiova mo ni nanuma na ka oqo, ni sa vosavakacaca na meca, Ka ra sa beca na yacamuni ko ira na mataqali lialia.

¹⁹ Kakua ni solia yani na yalona na nomuni ruve ki na nodra i soqosoqo nai valavala ca: Mo ni kakua ni guilecava tikoga nai soqosoqo ni nomuni tamata dravudravua.

²⁰ Mo ni nanuma na vosa ni yalayala: Ni sa robota na veiyasana butobuto kei vuravura na nodra veivale na dauveivakararawataki.

²¹ Me ra kakua ni lesu tale ka vakamaduataki ko ira era vakacacani: Me ra dui vakavinavinaka ki na yacamuni ko ira na rarawa kei na dravudravua.

²² Mo ni tu cake, na Kalou, mo ni veileti e na vukumuni: Mo ni nanuma ni sa vosavakacataki kemuni e na veisiga na tamata lialia.

²³ Mo ni kakua ni guilecava na domodra na nomuni meca: Sa lako cake tikoga na nodra ue era tu cake me veivala kei kemuni.