NA SAME 73 - Vakavakadewa Makawa

Sa tukuna ni sa sega ni kila nai balebale ni nodra tiko vinaka sara nai valavala ca, 1-12. Ni sa yalolailai kina, sa lako ki na vale ni Kalou, ka sa qai kila; ka sa reki ni ra sa nonai yau na Kalou, 13-28. A Same i Esafa.

¹ Sa yalololoma vakaidina na Kalou vei ira na Isireli, Io, vei ira era sa yalosavasava.

² Ia koi au, sa voleka ni lako sese na yavaqu; Sa voleka ni tidara na noqu i lakolako.

³ Ni'u a vuvutaki ira na lialia, Ni'u a raica na nodra tiko vinaka na tamata caka ca.

⁴ Ni sa sega vei ira nai vau ni mate: Ka sa dei ga na nodra kaukauwa.

⁵ Era sa sega ni rarawa me vaka na tamata tani; Ka ra sa sega ni cudruvi e na mate me vaka na tamata tani.

⁶ O koya oqo sa taubeni ira kina na viavialevu me vaka e dua nai taube; Sa tutuvitaki ira nai valavala vakaukauwa me vaka nai sulu.

⁷ Sa levu tu na matadra e na uro: Na nodra ka sa sivita na nanuma ni lomadra.

⁸ Era sa dauveivakalialiai, ka ra vosataka vakaca nai valavala kaukauwa: Era vosa vakaviavialevu.

⁹ Era sa vosavakacataka na lomalagi, Ka sa lakovi vuravura na yamedra.

¹⁰ O koya oqo era sa lesu maikina ki ke na nona tamata: Ka sa loba vei ira na wai me sinai sara na medra bilo.

¹¹ Era sa kaya, Sa kila vakaevei na Kalou? Ka sa vuku vakacava ko Koya sa Cecere sara?

¹² Raica, ko ira oqo na tamata i valavala ca, Ka ra sa tiko vinaka ga e vuravura; ka sa levu cake tiko na nodra i yau.

¹³ E dina sa sega ni yaga ni'u sa vuya na lomaqu, Ka vuluvulu e nai valavala savasava.

¹⁴ Ni'u sa yaviti tiko e na siga ka bogi, Ka cudruvi e na mataka kecega.

¹⁵ Kevaka ka'u sa kaya, Au na vosa vakaoqo; Raica, au na vakacalai ira na mataqali ni nomuni tamata.

¹⁶ Ni'u a nanuma me'u kila na ka oqo, Sa ka dredre sara vei au;

¹⁷ Ia ni ka'u a qai lako ki na vale tabu ni Kalou; Ka'u a qai kila rawa na kedrai vakataotioti.

¹⁸ E dina ga kemuni a lesi ira ki na sala titidara; O ni sa biuti ira sobu ki na veivakarusai.

¹⁹ Sa vaka na liva na nodra vakarusai mai! Era sa rusa ka oti sara e na ka rerevaki.

²⁰ Me vaka na tadra ni sa yadra maikina e dua; Sa vakakina, kemuni na Turaga, ni kemuni sa yadra, ko ni na beca na nodra yaloyalo.

²¹ Ni sa rarawa na yaloqu, Ka sa vakararawataki na lomaqu.

²² Au a lialia vakaoqo, ka sega ni vuku; Au a vaka na manumanu e matamuni.

²³ Ia ka'u sa tiko ga kei kemuni e na veisiga: O ni sa taura tiko na ligaqu i matau.

²⁴ O ni na tuberi au e na nomuni lewa, Ka kauti au emuri ki na vanua vakaiukuuku.

²⁵ O cei tale e yaga vei au mai lomalagi? Ka sa sega e vuravura ka'u sa domona, oi kemuni duaduaga.

²⁶ Sa malumalumu mai na yagoqu kei na lomaqu: Ia, na Kalou na kaukauwa ni lomaqu, kei na noqu i votavota ka sega ni mudu.

²⁷ Raica, era na rusa ko ira kecega era sa tiko vakayawa vei kemuni: O ni sa vakarusai ira kecega era sa biuti kemuni me ra gole tani.

²⁸ Ia koi au, e yaga vei au me'u toro vua na Kalou: Au sa vakararavi oti vua na Turaga ko Jiova, Me'u tukuna kina na nomuni cakacaka kecega.