NA SAME 72 - Vakavakadewa Makawa

Sa masulaki Solomoni ko Tevita, ka vakatakila na ka vinaka ena yaco e na nona lewa, 1-17. Sa vakavinavinaka kina, 18-20. A Same kei Solomoni.

¹ Kemuni na Kalou mo ni solia vua na tui na nomuni lewa dodonu, Kei na nomuni cakacaka dodonu vua na luvena na tui.

² Ena lewai ira vakadodonu na nomuni tamata ko koya, Kei ira na nomuni tamata dravudravua e na lewa vinaka.

³ Ena tubura na kedra sautu na tamata na veiulu-ni-vanua, Kei na veiulu-ni-koro, e na lewa dodonu.

⁴ Ena lewa ko koya e na vukudra na tamata era vakararawataki, Ena vakabula na luvedra na dravudravua, Ka musuki koya sa dauivalavala vakaukauwa.

⁵ Era na rerevaki kemuni ni sa tikotikoga na mata-ni-siga, Kei na vula, io e nai tabatamata kecega.

⁶ Ena lako sobu mai ko koya me vaka na uca ki na buroro: Me vaka na uca sa vakasuasuataka na qele.

⁷ Ena tubu vinaka mai e na nona gauna ko ira na yalododonu; Kei na sautu levu, ka yacova na gauna e oti kina na vula.

⁸ Ena lewa talega mai na dua na wasawasa ka yacova na wasawasa ka dua, Mai na Uciwai talega, ka yacova nai yalayala kei vuravura.

⁹ Era na cuva vua ko ira era tiko mai lekutu; Era na dramica na kuvu-ni-soso ko ira na nona meca.

¹⁰ O ira na tui Tasisi kei na tui ni veiyanuyanu, era na kauta mai nai madrali: O ira na tui Sipa kei na tui Sepa era na cabora na ka ni loloma.

¹¹ Ia ko ira kecega na tui, era na cuva vua: Era na qaravi koya na veimatanitu kecega.

¹² Ni na vakabula ko koya na dravudravua ni sa tagi; Kei koya sa vakararawataki ka sa sega e dua me vukei koya.

¹³ Ena lomana ko koya na tamata malumalumu ka dravudravua, Ka vakabula na yalodra na dravudravua.

¹⁴ Ena vakabula na yalodra mai na lawaki kei nai valavala kaukauwa: Ena ka talei talega e matana na kedra dra.

¹⁵ Ena bula ko koya, ka na soli talega vua na koula mai Sipa: Ena ia tiko talega na masu e na vukuna; Ena vakavinavinakataki talega e na veisiga.

¹⁶ Ena sautu e vuravura e na dela ni veiulu-ni-vanua na sila e qumi rawarawa ga; Ena kurekure na vuana me vakataki Lepanoni: Era na tubu vinaka talega na lewe ni koro me vaka na co ni vanua.

¹⁷ Ena sega ni oti rawa na yacana: Ena tikotikoga na yacana ni sa tu na mata-ni-siga: Ka ra na vakalougatataki na tamata e na vukuna; Era na vosaveivakalougatataki koya na lewe ni veivanua kecega.

¹⁸ Me vakavinavinakataki ko Jiova na Kalou, na Kalou ni Isireli, O koya duaduaga sa cakava na ka e veivakurabuitaki.

¹⁹ Ia me vakavinavinakataki na yacana vakaiukuuku ka sega ni mudu; Ia me sinai talega ko vuravura taucoko e na nonai ukuuku. Emeni, Emeni.

²⁰ Sa oti na masu i Tevita na luve i Jese.