NA SAME 71 - Vakavakadewa Makawa

A masu ni tamata yalododonu sa vakararawataki.

¹ I Jiova, au sa vakararavi vei kemuni: Kakua ni laivi au me'u vakamaduataki e na dua na gauna.

² Mo ni vakabulai au e na nomuni yalododonu, ka me'u dro rawa: Mo ni vakatu daligamuni kivei au, ka vakabulai au.

³ Mo ni noqu vale kaukauwa, me'u dro tikoga kina: O ni sa vosa oti me'u vakabulai; Ni kemuni sa noqu uluvatu kei na noqu koro vakabai.

⁴ Mo ni vakabulai au, na noqu Kalou, mai na ligana na tamata i valavala ca, Mai na ligana na tamata sa sega ni dodonu ka sai valavala vakaukauwa.

⁵ Ni sai kemuni ga, na Turaga Jiova, ka'u sa nuinui tiko kina: Oi kemuni ga ka'u a vakararavi kina ni'u a cauravou ka yacova na gauna oqo.

⁶ O ni a tokoni au mai na siga ka'u a sucu kina; Oi kemuni ga ka kauti au mai na kete i tinaqu: Au na vakavinavinaka tikoga e na vukumuni.

⁷ Au sa vaka na ka e dauveivakidacalataki vei ira na lewe vuqa; Ia koi kemuni ga na noqu i drodro kaukauwa.

⁸ Me sinai na gusuqu e na vakavinavinaka vei kemuni, Kei na vakacaucautaki kemuni e na siga ka bogi.

⁹ Kakua ni biuti au e na gauna ka'u sa qase mai kina; Kakua ni laivi au ni sa oti na noqu kaukauwa.

¹⁰ Ni ra sa vosavakacacataki au ko ira na noqu meca; A ra sa bose vata ko ira era sa lawakitaka na yaloqu.

¹¹ Ka kaya, Sa biuti koya na Kalou: Dou vakasavi koya ka taura; ni sa sega e dua me vakabulai koya.

¹² Na Kalou, mo ni kakua ni vakayawa vei au: Noqu Kalou, mo ni kusarawa ni vukei au.

¹³ Me ra vakamaduataki ka vakarusai ko ira era sa meca ni yaloqu; Me ra vakarogocataki vakalevu ka me ra sega ni dokai ko ira sa segata na ka me'u ca kina.

¹⁴ Ia koi au, ka'u na vakanuinui tikoga, Ka vakavinavinaka vakalevu cake tiko vei kemuni.

¹⁵ A gusuqu, ena tukuna tikoga na nomuni cakacaka dodonu, Kei na bula sa maivei kemuni e na siga ka bogi; Ni'u sa sega ni kila na kenai wiliwili.

¹⁶ Au na lako tu ga e na kaukauwa ni Turaga ko Jiova: Au na tukuna na nomuni cakacaka dodonu, io, na nomuni duaduaga.

¹⁷ O ni a vakavulici au, na Kalou, ni'u a gone: Ka yacova na gauna oqo ka'u sa tukuna tiko na nomuni cakacaka e veivakurabuitaki.

¹⁸ Oqo talega, ni ka'u sa qase ka sika mai, mo ni kakua ni laivi au na Kalou; Ka me'u vakatakila mada eliu na nomuni kaukauwa vei ira nai tabatamata oqo, Kei na nomuni qaqa vei ira kecega era na tubu maimuri.

¹⁹ A nomuni yalododonu talega, na Kalou, sa ka cecere sara, O ni sa cakava oti na ka vakaidina: Na Kalou, o cei sa vakataki kemuni!

²⁰ Oi kemuni ko ni sa vakatakila mai vei keimami na ka rarawa vakalevu ka ca sara, O ni na vakabulai keimami tale, Ka kauti keimami cake tale mai na wai titobu e vuravura.

²¹ O ni na vakalevulevui au, Ka vakacegui au e na veiyasana kecega.

²² Au na seretaki kemuni talega e na soliteri, Io na nomuni yalodina, na noqu Kalou: Au na sere vei kemuni e na api, Oi kemuni na Yalosavasava ni Isireli.

²³ Ena marau vakalevu na tebenigusuqu ni'u sa sere vei kemuni; Kei na yaloqu, o koya ko ni sa vakabula.

²⁴ A yamequ talega, ena tukuna tikoga na nomuni cakacaka dodonu e na siga kecega ka bogi: Ni ra sa vakamaduataki, ni ra sa vakarogocataki ko ira era sa segata me'u vakacacani.