NA SAME 69 - Vakavakadewa Makawa

A masu sa ia e na gauna ni veivakacacani. Vua na Domo-ni-sere e na Sosanimi. A Same i Tevita.

¹ Mo ni vakabulai au, na Kalou; Ni sa mai luvuca na yaloqu na wai.

² Au sa lutudromu e na oruoru, sa sega kina na vanua me'u tu kina: Au sa yaco ki na wai titobu, sa dromuci au kina na wai levu.

³ Au sa oca e na tagi: sa mamaca na noqu i tilotilo: Sa malumalumu na mataqu ni'u sa waraki koya tiko na noqu Kalou.

⁴ Ko ira era sa cati au walega era lewe vuqa ka lailai na drau ni uluqu: Era kaukauwa ko ira era sa via vakarusai au, ni ra sa noqu meca walega: Au a qai vakasuka tale na ka ka'u a sega ni kovea.

⁵ Kemuni na Kalou, ko ni sa kila na noqu lialia; Ka sa sega ni vuni vei kemuni na noqu i valavala ca.

⁶ Me ra kakua ni madua e na vukuqu ko ira era qaravi kemuni na Turaga ko Jiova ni lewe vuqa; Na Kalou ni Isireli, me ra kakua ni vakamaduataki e na vukuqu ko ira era qarai kemuni.

⁷ Ni'u sa vosavakacacataki e na vukumuni; Sa luvu na mataqu e na madua.

⁸ Au sa vaka na kai tani vei ira na taciqu, Kei na vulagi vei ira na luve i tinaqu.

⁹ Ni sa kani au sara na loloma katakata ki na nomuni vale: Ka sa tau vei au na nodra vosa ca ko ira era sa vosavakacacataki kemuni.

¹⁰ Ni'u a tagi, ka vakararawataka na yaloqu ni'u a lolo, Ka'u a vosavakacacataki kina.

¹¹ Au a vakaisulutaki au talega e nai sulu taga; Ia ka'u a vakaibole kina vei ira.

¹² Era dauvosavakacacataki au ko ira era sa dautiko e na matamata-ni-koro; Ka ra sa serekalitaki au ko ira na daumateni.

¹³ Ia koi au, Kemuni Jiova, au sa masu vei kemuni e na gauna ni vinakati: Mo ni rogoci au, na Kalou, e na kena levu ni nomuni loloma, Ni kemuni sa daudina ni ia na veivakabulai.

¹⁴ Mo ni vueti au mai na lolobo, me'u kakua ni dromu kina; Me'u vakabulai maivei ira era sa cati au, mai na wai titobu talega.

¹⁵ Me kakua ni luvuci au na wai levu, Ka me kakua ni tilomi au na wai titobu, Me kakua talega ni sogolati au ki loma na gusu ni bulubulu.

¹⁶ Mo ni rogoci au, Jiova; ni sa ka vinaka na nomuni loloma: Mo ni golevi au mai me vaka na kena levu ni nomuni yalololoma.

¹⁷ Ia mo ni kakua ni vunia na matamuni vua na nomuni tamata: Ni'u sa vakararawataki: mo ni rogoci au kusarawa.

¹⁸ Mo ni toro voleka mai ki na yaloqu, ka sereka: Ni vakabulai au e na vukudra na noqu meca.

¹⁹ O ni sa kila na ka ka'u sa vosacataki kina, kei na ka ka'u sa vakamaduataki kina, kei na ka ka'u sa vakarogocataki kina: Era tiko kecega e matamuni na noqu meca.

²⁰ Sa vakamavoataka na yaloqu na vosa ca; ka'u sa bibi sara: Ia ka'u sa rai voli me lomani au e dua, ka sa segai; Me so talega me vakacegui au, ka sa sega e dua ka'u kunea.

²¹ Era sa solia talega na ka gaga me qau kakana; Kei na wai wiwi me'u gunuva ni'u a viagunu.

²² Me kenai cori vei ira ga na nodra tepeli: Kei na nodra tiko vinaka, me sa tudai.

²³ Me vakabutobutotaki na matadra, me ra kakua ni rai rawa; Ia mo ni vakasautanininitaka tikoga na tolodra.

²⁴ Ni sovaraka vei ira na nomuni cudru, Ia me tau vei ira na nomuni cudru waqawaqa.

²⁵ Me lala didi mai na nodra vale; Ia me kakua e dua me tiko e nodra vale laca.

²⁶ Ni ra sa vakacacani koya ko ni sa yavita; Ka vosavakararawataki ira ko ni sa vakamavoataka.

²⁷ Mo ni sauma na nodra i valavala tawa dodonu: Me ra kakua talega ni vakadonui vei kemuni.

²⁸ Me ra bokoci laivi mai nai vola ni bula, Ia me ra kakua ni volai vata kei ira na yalododonu.

²⁹ Ia koi au ka'u sa malumalumu ka rarawa: Me vakatoroi au ki cake, na bula sa maivei kemuni na Kalou.

³⁰ Au na vakavinavinaka ki na yaca ni Kalou e na sere, Ka vakalevulevui koya e na vakamolimoli.

³¹ Ena vinaka na ka oqo vei Jiova, ka ca na pulumokau, Se na pulumokau tagane sa vakaileu ka vaququ.

³² Era na kunea na ka oqo na yalomalumalumu, ka reki: Ena bula talega na lomamudou sa qarai koya na Kalou.

³³ Ni sa rogoci ira na dravudravua ko Jiova, Ka sega ni beci ira na nona era sa vesuki.

³⁴ Me vakavinavinaka vua ko lomalagi kei vuravura, Na wasawasa kei na ka kecega sa bula voli kina.

³⁵ Ni na vakabulai Saioni na Kalou, ka tara na veikoro i Juta; Me ra tiko maikina, ka taukena.

³⁶ Era na taukena talega ko ira na nodra kawa na nona tamata: Ka ra na tiko kina ko ira era sa lomana na yacana.