NA SAME 67 - Vakavakadewa Makawa

A masumasu me yaco na lewa ni Kalou e vuravura. Vua na Domo-ni-sere e na Nikinoca. A Same.

¹ Me yalololoma mai vei keimami, na Kalou, ka vakalougatataki keimami; Ka me cilavi keimami na matana. Sela.

² Me kilai kina na nomuni valavala e vuravura, Kei na bula sa maivei kemuni ki na lewe ni veimatanitu kecega.

³ Me ra vakavinavinaka vei kemuni na Kalou, ko ira na lewe ni veivanua; Io, me ra vakavinavinaka vei kemuni ko ira na lewe ni veivanua kecega.

⁴ Me ra reki na veivanua ka sere e na marau: Ni kemuni na lewai ira vakadodonu na veimataqali, Ka tuberi ira na veimatanitu e vuravura. Sela.

⁵ Me ra vakavinavinaka vei kemuni na Kalou, ko ira na lewe ni veivanua: Io, me ra vakavinavinaka vei kemuni ko ira na lewe ni veivanua kecega.

⁶ Ena qai vuataka na vuana ko vuravura; Ena qai vakalougatataki keda na Kalou, io, na noda Kalou.

⁷ Ena vakalougatataki keda na Kalou; Ena rerevaki koya talega nai yalayala kecega kei vuravura.