NA SAME 66 - Vakavakadewa Makawa

Me ra vakavinavinaka vua na Kalou na lewe ni veivanua, ka cuva vua, ni sa lewa na ka kecega ko koya, 1-7. Ka sa levu na nona loloma vei ira na nona tamata, 8-12; ka levu vei Tevita, 13-20. Vua na Domo-ni-sere. A Sere.

¹ Dou sere vakadomoilevu vua na Kalou, na veivanua kecega:

² Dou seretaka na yacana ka daurogorogo vinaka: Dou vakaiukuukutaka na vakavinavinaka vua.

³ Dou kaya vua na Kalou, A kena rerevaki na nomuni cakacaka! E na vuku ni nomuni kaukauwa levu era na vakamalumalumutaki ira vei kemuni na nomuni meca.

⁴ Era na cuva vei kemuni na kai vuravura kecega, Ka sere vei kemuni; Era na serevaka na yacamuni. Sela.

⁵ Dou mai raica na cakacaka ni Kalou: Sa ka rerevaki na nona cakacaka vei ira na luve ni tamata.

⁶ Sa vukica na wasawasa me vanua mamaca: Era a lakova na wai levu e na yavadra: E na yasana ko ya eda a rekitaki koya.

⁷ Sa lewa ko koya e na nona kaukauwa ka sega ni mudu; Sa raica tiko na veimatanitu na matana: Me ra kakua ni vakalevulevui ira na yalovakatani. Sela.

⁸ Dou vosavinakataka na noda Kalou, oi kemudou na veimataqali, Ka vakarogorogoya na vakavinavinaka vua:

⁹ O koya sa maroroya tikoga na noda bula, Ka sega ni laiva na yavada me yavalati.

¹⁰ Ni kemuni sa vakatovolei keimami, na Kalou. O ni sa vakatovolei keimami, me vaka sa vakatovolei na siliva.

¹¹ O ni a kauti keimami ki loma ni lawa, O ni a tauca nai colacola bibi e daku i keimami.

¹² O ni a cakava na tamata me ra ladeva na ulu i keimami, ni ra vodo ose tiko; Keimami a lako e na loma ni bukawaqa e loma ni wai talega: Ia ko ni a kauti keimami ga ki na vanua vinaka.

¹³ Au na curuma na nomuni vale ka kauta nai soro kama; Au na vakayacora vei kemuni na ka ka'u a bubului kina,

¹⁴ Ko ya sa cavuta na tebenigusuqu, Ka sa vosataka na gusuqu, ni'u a vakararawataki.

¹⁵ Au na vakacabora vei kemuni mei soro kama na manumanu uro, Kei na sipi tagane me ka boi vinaka; Au na vakacabora na pulumokau kei na me. Sela.

¹⁶ Dou toro mada mai mo dou rogoca, oi kemudou kecega sa rerevaka na Kalou, Ka'u na tukuna na ka sa cakava ko koya e na vuku ni yaloqu.

¹⁷ Au a tagi vua e na gusuqu, Ka vakalevulevui koya e na yamequ.

¹⁸ Kevaka ka'u goleva e lomaqu nai valavala ca, Ena sega ni rogoci au na Turaga:

¹⁹ Ia sa rogoci au vakaidina na Kalou; Sa vakarorogo ki na domo ni noqu masu.

²⁰ Me vakavinavinakataki na Kalou, Ni sa sega ni biuta tani na noqu masu, se na nona loloma vei au.