NA SAME 65 - Vakavakadewa Makawa

Sa vakavinavinaka vua na Kalou ni sa vakabulai ira, 1-5. Sa kaukauwa na Kalou, 6-8, ka yalololoma, 9-13. Vua na Domo-ni-sere. A Same i Tevita.

¹ Sa waraki kemuni tiko, na Kalou, na vakavinavinaka mai Saioni: Ena vakayacori talega na ka ka'u sa bubului kina vei kemuni.

² Oi kemuni sa daurogoca na masu, Ena toro mai vei kemuni na tamata kecega.

³ Sa gumatua vei au na vosa ca: A neimami valavala ca ko ni na vuya laivi.

⁴ Sa kalougata na tamata ko ni sa digitaka, ka kauta voleka mai, Me tiko ga e na nomuni lomanibai: Keimami na vakamamautaki e na ka vinaka mai na nomuni vale, Io, na nomuni vale tabu.

⁵ E na ka dodonu e rerevaki ko ni na vosa vei keimami, Na Kalou na neimami vakabula; Oi kemuni era sa vakararavi kina e nai yalayala kecega kei vuravura, kei ira talega era tiko vakayawa e loma ni wasawasa:

⁶ O koya sa vakataudeitaka na veiulu-ni-vanua e na nona kaukauwa; Ni sa vauci tu e na kaukauwa:

⁷ Ka sa vakamaravutaka na cudru ni wasawasa, kei na vadugu ni biau, Kei na nodra ue na tamata.

⁸ O ira talega era tiko e nai yalayala kei vuravura era sa rerevaka na nomuni vakatakilakila: O ni sa dauvakamarautaka na mataka ni sa kida, kei na yakavi ni sa dromu tiko na siga.

⁹ O ni sa talevi vuravura, ka sa vakasuasuataka: O ni sa vakavutuniyautaka E na uciwai ni Kalou, Ko ya sa sinai tu kina na wai; O ni sa solia vei ira na sila, ni kemuni sa vakarautaka oti na vanua.

¹⁰ O ni sa vakasuasuataka vakalevu na kena bukebuke; O ni sa vakatauca na uca ki na kena tova; O ni sa vakamalumalumutaka e na uca; O ni sa vakalougatataka na ka e tubu kina.

¹¹ O ni sa vakaisalataka na yabaki e na nomuni loloma; A sa tau mai na uro mai na nomuni lakolako.

¹² Sa tau ki na vanua veico mai lekutu: Ka sa reki tu na veiulu-ni-koro e na veiyasana kecega.

¹³ Sa robota na vanua veico na sipi; Ia na veibuca sa roboti tu e na sila; Era kaila e na reki, io, era sere tiko.