NA SAME 64 - Vakavakadewa Makawa

Sa vakatakila na nona meca, 1-6. Ena cudruvi ira na Kalou, a ra na rere kina na tamata, ka reki na yalododonu, 7-10. Vua na Domo-ni-sere. A Same i Tevita.

¹ Mo ni rogoca na domoqu, na Kalou, e na noqu masu: Mo ni maroroya na noqu bula me'u kakua ni rerevaka na meca.

² Vunitaki au mai na nodra vere lo na daucaka ca; Kei na nodra ue na daucaka cala:

³ O ira era sa vagatara na yamedra me vaka nai seleiwau, Era sa navuca na nodra dakai me vanataka na nodra gasau, na vosa gaga.

⁴ Me ra vanai koya lo sa sega ni cala: Era vanavana vakidacala vua, ka ra sega ni rere.

⁵ Era vaqaqataki ira e na ka ca: Era bose me ra biri dai lo; Era sa kaya, O cei ena kunei ira?

⁶ Era qara na ka ca; era gumatua ni vakasaqaqara: Ia na nanuma ni lomadra kei na yalodra na tamata yadua, sa ka titobu sara.

⁷ Ia na Kalou ena vanai ira e na gasau; Era na vuetaki vakasauri.

⁸ Era na vukica na yamedra me lauti ira vakai ira: Era na dro tani ko ira kece sa raici ira.

⁹ Ka ra na rere na tamata kecega; Ka tukuna na cakacaka ni Kalou; Ka ra na nanuma vakavuku ki na nona cakacaka.

¹⁰ Era na rekitaki Jiova ka vakararavi vua ko ira na yalododonu; Ka ra na vakavinavinaka ko ira kecega na yalodina.