NA SAME 62 - Vakavakadewa Makawa

Sa vakararavi tabakidua vua na Kalou ko Tevita, 1-7. Sa vakaroti ira na tamata kecega me ra vakararavi vua, 8-12. Vua na Domo-ni-sere, vei ira na Jitucuni. A Same i Tevita.

¹ Sa wawa tikoga na yaloqu vua na Kalou; Vei koya ga ka'u na vakabulai kina.

² O koya ga na noqu uluvatu kei na noqu i vakabula; Na noqu vale cecere ko koya; ka'u na sega ni yavalati vakalevu.

³ A cava na kena dede dou nanuma kina na ka ca mo dou vakayacora vua na tamata? Dou na moku koi kemudou kecega: Dou na vaka na bai vatu sa vakalakala tu, kei na bai kau sa yavala toka.

⁴ Era bose ga me ra vakasivoi koya mai na nona ka vakaturaga: Era marautaka na ka lasu: Era vakavinavinaka e na gusudra, ia era sa ruru ga e lomadra. Sela.

⁵ Na yaloqu, mo wawa tikoga vua na Kalou; Ni sa vu mai vei koya ga na ka ka'u nuitaka tiko.

⁶ O koya duaduaga na noqu uluvatu, kei na noqu i vakabula: Na noqu i drodro cecere ko koya; ka'u na sega ni yavalati.

⁷ Sa vu mai vua na Kalou na noqu bula kei na noqu vakarokoroko: Na noqu uluvatu kaukauwa, kei na noqu i drodro na Kalou.

⁸ Dou vakararavi vua e na veisiga kecega; oi kemudou na tamata, Dou sova yani na lomamudou e matana: Sa nodai drodro na Kalou. Sela.

⁹ E dina era ka walega na tamata kaisi, ka ra sa ka lasulasu na tamata turaga: Kevaka era sa vakarautaki, era tautauvata ga, ni ra ka mamada wale sara.

¹⁰ Dou kakua ni vakararavi e nai valavala vakasausa, Ka kakua ni viavialevu e na daubutako: Kevaka sa levu mai nai yau, dou kakua ni daunanuma kina.

¹¹ Sa vosa vakadua na Kalou; Io, ka'u sa rogoca vakarua oqo; ni sa nona ga na Kalou na kaukauwa;

¹² Ka sa nomuni talega, na Turaga, na yalololoma: Ni kemuni sa solia vei ira na tamata yadua me vaka na nodra i valavala.