NA SAME 60 - Vakavakadewa Makawa

Sa masu vua na Kalou me oti na nona cudruvi ira, 1-4; ka sa cavuta na nona vosa ni yalayala, 5-8; kei na nodra vakararavi kina, 9-12. Vua na Domo-ni-sere e na Susani-ituca. A Same i Tevita, mei vakavuvuli; ni sa kabai ko Mesopotemia kei Siriasopa, ni sa lesu mai ko Joapi ka vakamatei ira na kai Itomi e le tinikarua na udolu e na buca ni masima.

¹ Oi kemuni na Kalou, ko ni sa biuti keimami, o ni sa dui vakasevi keimami; Ko ni a cudru; mo ni lesu tale mai vei keimami.

² O ni sa cakava me sautaninini na vuravura; ko ni sa basuka: Mo ni vakavinakataka na veitikina sa ca; ni sa veitosoyaki.

³ O ni sa vakayacora na ka rarawa vei ira na nomuni tamata; Ko ni sa vagunuvi keimami e na waini keimami yatayata kina.

⁴ O ni sa solia na kuila vei ira era sa rerevaki kemuni, Me cecebuya e na vuku ni nomuni yalodina. Sela.

⁵ Me vakabulai kina ko koya ko ni sa lomana; Mo ni vakabulai au e na ligamuni matau, ka rogoci au.

⁶ Sa vosa oti na Kalou e nona yalosavasava; Au na rekitaka; Au na votai Sikemi, ka vakarauta na buca mai Sukoci.

⁷ Sa noqu ko Kiliati, ka sa noqu ko Manasa; Ai vakaruru ni uluqu ko Ifireimi; A noqu tamata daulewa ko Juta;

⁸ A noqu i vuivui ko Moapi; Ko Itomi, ka'u na viritaka vua na noqu i vava: Ko Filisitia, ka'u na kailataka.

⁹ O cei ena kauti au ki na koro kaukauwa? O cei ena tuberi au cake ki Itomi?

¹⁰ Oi kemuni na Kalou, se segai, oi kemuni ka sa biuti keimami? Ia koi kemuni na Kalou, ko ni sa sega ni lako vata kei ira na neimami valu?

¹¹ Mo ni vukei keimami mai me oti na ka rarawa; Ni sa ka walega na nodra veivuke na tamata.

¹² E na vuku ni Kalou eda na gugumatua; Ni sai koya ga ena buturaka sobu na noda meca.