NA SAME 6 - Vakavakadewa Makawa

A masu ni sa vakararawataki Vua na Domo-ni-sere e na Nikinoca e na Seminica. A Same i Tevita.

¹ I Jiova, mo ni kakua ni vunauci au e nomuni cudru, Kakua ni cudruvi au e na nomuni cudru katakata.

² I Jiova mo ni yalololoma mai vei au; ni'u sa malumalumu: Ni vakabulai au, Jiova, ni sa rarawa na suiqu.

³ A yaloqu talega sa rarawa vakalevu; Ia koi kemuni, Jiova, ena vakaevei na kena dede?

⁴ I Jiova, ni lesu tale mai ni vakabula na yaloqu: Ni vakabulai au e na vuku ni nomuni loloma.

⁵ Ni sa sega ni rawa na vakananumi kemuni e na mate: O cei ena vakamolimoli vei kemuni e nai bulubulu?

⁶ Au sa oca e na noqu vutugu: Au sa vakanawa na noqu i mocemoce e na bogi kecega; Au sa vakasuasuataka na noqu i davodavo e na wai ni mataqu.

⁷ Sa buawa na mataqu e na vuku ni noqu rarawa; Ka sa qase mai e na vukudra kecega na noqu meca.

⁸ Dou lako tani vei au, koi kemudou kecega sa kitaka na ca; Ni sa rogoca ko Jiova na domo ni noqu tagi.

⁹ Sa rogoca ko Jiova na noqu kerekere, Ena vakabauta na noqu masu ko Jiova.

¹⁰ Me ra madua kecega na noqu meca ka me ra velavela sara; Me ra lesu tale, ka me ra madua vakasauri sara.