NA SAME 59 - Vakavakadewa Makawa

Sa masuta na Kalou ko Tevita me vakabulai koya mai na nona meca, 1,2. A nodra i valavala na nona meca, 3-7. Era na cudruvi, 8-15. Sa vakavinavinaka ko koya vua na Kalou, 16,17. Vua na Domo-ni-sere; Ali-tasikici. A Same i Tevita, ni sa talaki ko Saula, a ra sa vakatawa na vale me ra vakamatei koya.

¹ Mo ni vakabulai au, na noqu Kalou, mai vei ira na noqu meca: Mo ni vakarurugi au maivei ira era sa tu cake kivei au.

² Vakabulai au maivei ira na daucaka cala, Ka vakabulai au mai na tamata dauveivakamatei.

³ Ni ra sa lawavaka na yaloqu: Era sa soqoni vata na qaqa me veivala kei au; Ka segai, Jiova, e na vuku ni noqu talaidredre, se na noqu i valavala ca.

⁴ Era sa cici ka vakarautaki ira, ka segai e na vuku ni noqu caka cala: Mo ni yadra mo ni vukei au, ka vakaraica.

⁵ Ia koi kemuni, Jiova, na Kalou ni lewe vuqa, na Kalou ni Isireli, Mo ni yadra me cudruvi ira kece na veimatanitu: Mo ni kakua ni vosoti ira na caka cala era sa dautalaidredre. Sela.

⁶ Era daulesu mai kei na yakavi; era osooso me vaka na koli, Ka vakavolivolita na koro.

⁷ Raica, era sa dausova vosa e na gusudra: Sa tiko nai seleiwau e na tebenigusudra: Ni ra sa kaya tiko, O cei sa rogoca?

⁸ Ia koi kemuni, Jiova, ko ni na dredrevaki ira; Ko ni na vakalialiai ira kecega na veimatanitu.

⁹ E na vuku ni nomuni kaukauwa, ka'u na qaravi kemuni kina: Ni sa noqu vale ni valu cecere na Kalou.

¹⁰ Ena liutaki au na noqu Kalou dauyalololoma: Ena vakaraitaka vei au na Kalou na ka sa na yacovi ira na noqu meca.

¹¹ Mo ni kakua ni vakamatei ira, de ra guilecava ko ira na noqu tamata: Mo ni vakasevi ira e nomuni kaukauwa; ka vakamalumalumutaki ira sobu; Kemuni na Turaga na neimami sasabai.

¹² E na vuku ni ca ni gusudra kei na vosa ni tebenigusudra, Me ra tauri ga e na nodra viavialevu: E na vuku talega ni ruru kei na lasu era vosataka.

¹³ Mo ni vakarusai ira e na nomuni cudru, ni vakarusai ira, me ra yali sara: Ka me ra kila ni sa lewa na Kalou vei ira na Jekope Ka yacova nai yalayala kei vuravura. Sela.

¹⁴ Me ra qai lesu mai kei na yakavi; ka osooso me vaka na koli, Ka vakavolivolita na koro.

¹⁵ Me ra qara voli na kedra, Ia kevaka era sega ni mamau, me ra ia tiko kei na bogi.

¹⁶ Ia koi au, ka'u na seretaka na nomuni kaukauwa; Io, ka'u na seretaka vakadomoilevu na nomuni loloma kei na mataka: Ni kemuni sa noqu vale ni valu cecere Kei na noqu i drodro e na siga ka'u sa rarawa kina.

¹⁷ Au na sere vei kemuni na noqu kaukauwa; Ni sa noqu vale ni valu cecere na Kalou, na noqu Kalou dauyalololoma.