NA SAME 56 - Vakavakadewa Makawa

Sa tagi vua na Kalou ko Tevita e na vuku ni nona meca, 1-8. Ka sa qai vakacegu ni sa nanuma na vosa ni Kalou, ka sa sega ni rere, 9-13. Vua na Domo-ni-sere e na Jonace-elemireokimi. A Same i Tevita, ni ra sa tauri koya na kai Filisitia mai Kaca.

¹ Mo ni lomani au mai, na Kalou; ni ra sa sagai au vakaca na tamata; O koya sai valu mai vei au, sa vakararawataki au e na veisiga.

² Era sa via tilomi au e na veisiga na noqu meca: Ni ra sa lewe vuqa era veivala kei au, oi kemuni sa Cecere.

³ A siga ka'u sa rere kina, Ka'u na vakararavi kina vei kemuni.

⁴ E na vuku ni Kalou ka'u na reki e na nona vosa, Au sa vakararavi tiko vua na Kalou; Au na sega ni rerevaka na ka era cakava rawa vei au na tamata.

⁵ E na veisiga kecega era kauta vakatani na noqu vosa; A ka kecega era sa nanuma sa ka ga me'u ca kina.

⁶ Era sa soqoni vata, era vunitaki ira, Era vakaraica na noqu i lakolako, Ni ra lawakitaka tiko na yaloqu.

⁷ Me ra dro bula li e na vuku ni nodra caka cala? E na nomuni cudru, na Kalou, mo ni biuti ira sobu na tamata.

⁸ O ni sa wilika na noqu veiseyaki: Mo ni vakataloca na wai ni mataqu ki na nomuni tavaya: Sa sega beka ni volai oti e na nomuni vola?

⁹ Ni'u sa tagi vei kemuni era na qai dro tani na noqu meca: Ka'u sa kila oqo: ni sa totaki au na Kalou.

¹⁰ E na vuku ni Kalou ka'u na reki e na nona vosa: E na vuku i Jiova ka'u na reki e na nona vosa.

¹¹ Au sa vakararavi vua na Kalou: Au na sega ni rerevaka na ka era cakava rawa vei au na tamata.

¹² Sa vauci au na noqu bubului vei kemuni na noqu Kalou: Me'u vakavinavinaka vei kemuni.

¹³ Ko ni sa vakabula oti na yaloqu mai na mate: Kei na yavaqu talega, me kakua ni tarabe, Me'u lako voli kina e na mata ni Kalou E na rarama ni bula?