NA SAME 55 - Vakavakadewa Makawa

Sa tagi vua na Kalou ko Tevita ni sa rere na yalona, 1-8. Sa tukuna ni ra sa nona meca na wekana eso, a ra sa lawakitaki koya, 9-15. Sa vakararavi vua na Kalou ka vakacegu e na vukuna, 16-23. Vua na Domo-ni-sere e na Nikinoca; a Masikili. A Same i Tevita.

¹ Mo ni vakatu daligamuni, na Kalou, ki na noqu masu; Ia mo ni kakua ni vunitaki kemuni mai na noqu kerekere.

² Mo ni nanumi au, ka vakarorogo vei au: Au sa vutugu e na noqu rarawa, ka sega ni vakacegu rawa;

³ E na vuku ni vosa ni meca, E na vuku ni nodra i valavala vakasaurara na caka cala: Ni ra sa beitaki au e na ka e sega ni dodonu, Ka ra sa vakararawataki au e na nodra cudru.

⁴ Sa rarawa vakalevu na yaloqu e lomaqu: Ka sa kani au na rerevaka na mate.

⁵ Sa kani au na rere kei na sautaninini, Ka sa luvuci au na domobula:

⁶ Ka'u a qai kaya, Me'u vakatabana mada me vaka na ruve! Ni'u na qai vuka yani, ka tiko vakacegu.

⁷ Raica, au na qai lako me'u vakayawa yani, Ka tiko vakadua ga e na lekutu. Sela.

⁸ Au na qai kusarawa ni dro tani Mai na cagi levu, kei na cava.

⁹ Mo ni vakarusai ira, kemuni na Turaga, ka wasea na yamedra: Ni'u sa kunea nai valavala kaukauwa kei na veileti e na koro.

¹⁰ Era sa lako voli e dela ni kena bai e na siga kei na bogi. Sa tiko e loma ni koro na caka cala kei na ka rarawa.

¹¹ Sa tiko ga kina nai valavala ca: A sa sega ni yali e na kena rara na dauveivakaisini kei na dauveivaqaseni.

¹² Ni sa sega ni koya na meca ka vosa vakacacataki au; Ke sa vakakina ke'u sa vosota rawa: Ka sa sega ni koya ka cati au ka vakalevulevui koya vei au; Ke sa vakakina ke'u sa vunitaki au vua:

¹³ Ia sai iko ga, na tamata edaru a veitokani vata, Ka noqu i tau edaru a dautiko vata vakaveiwekani.

¹⁴ Ia keirau a dauveivosaki vakavinaka vata, Ka daulako vata ki na vale ni Kalou.

¹⁵ Me kidaci ira na mate, Me ra lako bulabula sobu ki nai bulubulu: Ni sa tiko e nodra i tikotiko, kei na lomadra talega, nai valavala ca.

¹⁶ Ia koi au, ka'u na masu vua na Kalou; Ka na vakabulai au ko Jiova.

¹⁷ E na yakavi, kei na mataka, kei na siga levu, ka'u na masu, ka tagi vakadomoilevu: Ka na rogoca na domoqu ko koya.

¹⁸ Sa vakabula na yaloqu me'u vakacegu mai nai valu ka ia vei au: Ni ra sa lewe vuqa era vala kei au.

¹⁹ Ena vakarorogo na Kalou, ka vakararawataki ira, Io, ko koya ka tiko mailiu sara. Sela. Ni sa sega na veivukiyaki vei ira, Era sega kina ni rerevaka na Kalou.

²⁰ Sa dodoka na ligana ko koya vei ira era tiko sautu kaya: Sa vakacataka ko koya na nona vosa ni yalayala.

²¹ Sa malumalumu sara na vosa ni gusuna sa kaukauwa na pata; Ia sa tiko e lomana nai valu: Sa waicala na nona vosa ka cevata na waiwai, Ia sai seleiwau ga sa ucu tu.

²² Mo biuta vei Jiova na nomu i colacola bibi, ena tokoni iko ko koya: Ena sega ni laivi ira na yalododonu me ra vakayavalataki e na dua na gauna.

²³ Ia koi kemuni na Kalou, ko ni na biuti ira sobu ki nai keli ni rusa: O ira na tamata dauveivakamatei ka dauveivakaisini, era na sega ni bula me yacova na veimama ni nodra gauna; Ia koi au, ka'u na vakararavi vei kemuni.