NA SAME 54 - Vakavakadewa Makawa

Sa masuta na Kalou ko Tevita me vakabulai koya mai na nona meca, 1-3. Sa vakararavi ga vua na kalou, 4-7. Vua na Domo-ni-sere e na Nikinoca; a Masikili. A Same i Tevita, ni ra sa lako mai kivei Saula na kai Sifi, ka kaya, Sa sega beka ni vunitaki koya tiko vei keimami ko Tevita?

¹ Mo ni vakabulai au na Kalou, e na vuku ni yacamuni, Ka lewa e na vukuqu e na nomuni kaukauwa.

² Mo ni rogoca na noqu masu, na Kalou; Mo ni vakatu daligamuni ki na vosa ni gusuqu.

³ Ni ra sa tu mai me noqu meca na kai tani, A ra sa segata me'u mate ko ira era dauvakacaca; Era sa sega ni raici koya na Kalou ni tu e matadra. Sela.

⁴ Raica, sa noqu i vukevuke na Kalou: Sa tiko vata na Turaga kei ira era tokona na yaloqu.

⁵ Ena sauma ko koya na ca vei ira na noqu meca: Mo ni muduki ira laivi e nomuni yalodina.

⁶ Au na vakacabora vei kemuni nai madrali mai na vu ni lomaqu: Au na vakavinavinaka ki na yacamuni, Jiova; ni sa ka vinaka oqo.

⁷ Ni sa vakabulai au ko koya mai na ka rarawa kecega: Ka sa raica na mataqu na ka sa yaco vei ira na noqu meca.