NA SAME 52 - Vakavakadewa Makawa

Sa dokai koya ko Toeki e na nona qaqa, 1-4; ia sa na cudruvi koya na Kalou, 5-7. Sa vakararavi vua na Kalou ko Tevita, ka sa vinaka kina, 8,9. Vua na Domo-ni-sere; a Masikili. A Same i Tevita ni sa lako mai ko Toeki na kai Itomi ka sa tukuna vei Saula, ka kaya vua, Sa lako mai ko Tevita ki na vale i Eiimeleki.

¹ A cava ko sa vakalevulevui iko kina e na ca, o iko na tamata qaqa? A yalololoma ni Kalou sa sega ni mudu rawa.

² Sa vu ni ca tiko na yamemu; Sa vaka nai tasi gata, sa cakacaka vakaveivakaisini.

³ O sa vinakata na ka ca, ka cata na ka vinaka; O sa vinakata ni ko vosa lasu, ka cata ni ko vosa dodonu. Sela.

⁴ Ko sa vinakata na vosa kata kecega, Kei na gusu dauveivakaisini.

⁵ Ia na Kalou, ena vakarusai iko mo sega ni bula tale, Ena tauri iko, ka cavuti iko laivi mai na nomu i tikotiko; Ka cavuti iko tani mai na vanua ni bula. Sela.

⁶ A ra na raica na yalododonu, ka ra na rere, Ka ra na dredrevaki koya: ka kaya,

⁷ Raica, oqo na tamata sa sega ni vakararavi vua na Kalou me nona kaukauwa; Ia sa vakararavi ga e na kena levu ni nonai yau, Ka vakaukauwataki koya e na nonai valavala ca.

⁸ Ia koi au, ka'u sa vaka na olive bulabula e na vale ni Kalou: Au sa vakararavi tikoga e na loloma ni Kalou ka sega ni mudu.

⁹ Ena sega ni oti na noqu vakavinavinaka vei kemuni e na vuku ni ka kemuni a cakava: Ka'u na qarava tiko na yacamuni; ni sa vinaka oqo e matadra na nomuni tamata yalosavasava.