NA SAME 50 - Vakavakadewa Makawa

Sa daurerevaki na Kalou, ena sega ni yaga vua nai valavala ni lotu vakailasu; sa vinakata ga nai valavala dina. A Same i Esafa.

¹ O koya sa Kaukauwa, na Kalou, io, ko Jiova, sa vosa oti, A sa kacivi vuravura mai na yasana sa cadra kina na mata-ni-siga ka yacova na yasana sa dromu kina.

² Mai Saioni, na koro lagilagi duaduaga, Sa serau mai na Kalou.

³ Ena lako mai na noda Kalou, ena sega ni galu: Ena liutaki koya e dua na bukawaqa sa daukana voli, Ia sa na vakavolivoliti koya e dua na cava rerevaki.

⁴ Ena kacivi lomalagi maicake ko koya, Kei vuravura talega, me lewai ira na nona tamata ko koya,

⁵ Dou vakasoqoni ira vata kivei au na noqu tamata yalosavasava; O ira era sa ia na veiyalayalati kei au ni ra vakacabora nai soro.

⁶ Ia na lomalagi ena tukuna na nonai valavala dodonu: Ni sa lewa na Kalou vakataki koya ga. Sela.

⁷ Dou rogoca, na noqu tamata, ni ka'u na vosa; Ko iko na Isireli, ka'u na tukuna na nomu cala: Oi au ga na Kalou, na nomu Kalou.

⁸ Au na sega ni vunauci iko e na vuku ni nomu i soro, Se na nomu i soro kama ka tu tiko ga e mataqu.

⁹ Au na sega ni taura e dua na pulumokau mai na nomu vale, Se na me tagane mai na nomu bai ni me:

¹⁰ Ni sa noqu ga na pulumokau kila kecega mai na veikau, Kei na pulumokau lasa mai na veiulu-ni-vanua e udolu.

¹¹ Au sa kila yadua na manumanu vuka mai na veiulu-ni-vanua: Ka sa noqu na manumanu kila kecega ni vanua.

¹² Kevaka ka'u sa viakana, ka'u na sega ni tukuna vei iko: Ni sa noqu ko vuravura, kei na ka kecega sa sinai kina.

¹³ Au na kania li na lewe ni pulumokau tagane, Se gunuva na dra ni me?

¹⁴ Mo vakacabora vua na Kalou na vakamolimoli; Ka vakayacora na ka ko a bubului kina vei Koya sa Cecere sara:

¹⁵ Mo masuti au talega e na siga ni rarawa: Ka'u na vakabulai iko, ia ko na vakacaucautaki au.

¹⁶ Ia vei ira nai valavala ca, sa kaya na Kalou, A cava soti ko sa tukuna kina na noqu vunau, Ka sa cavuta talega e gusumu na noqu veiyalayalati?

¹⁷ Ni ko sa cata tiko nai vakavuvuli, Ka sa biuta ki dakumu na noqu vosa.

¹⁸ Ni ko a kunea na daubutako, ko a qai lomavata kaya, Ka sa votai vata kei ira na dauyalewa.

¹⁹ O sa solia na gusumu ki na ka ca, Ka sa tulia na ka lasu na yamemu.

²⁰ O sa tiko ga ka vosacataki koya na tacimu; Ko sa kaseti koya na luve i tinamu.

²¹ A ka oqo ko a kitaka, ia ka'u a galu ga; Ko a qai nanumi au me'u vakataki iko ga: Ia ka'u na vunauci iko, ka tuva e matamu na nomu i valavala ca oqo.

²² Dou nanuma mada na ka oqo, oi kemudou sa guilecava na Kalou. De'u sa basuraki kemudou, ka sega e dua me vakabulai kemudou.

²³ O koya sa vakacabora na vakavinavinaka sa vakacaucautaki au: Ia ko koya sa lewa vakavinaka na nonai valavala Ka'u na vakaraitaka vua na bula sa mai vua na Kalou.