NA SAME 48 - Vakavakadewa Makawa

Ai tukutuku kei Jiova, kei Jerusalemi na nonai tikotiko. A Same kei na Sere na nodra na luve i Kora.

¹ Sa levu ko Jiova, ka me vakavinavinakataki vakalevu E na koro ni noda Kalou, na nona ulu-ni-vanua tabu.

² Sa lagilagi sara na kenai tikotiko, era marautaka na kai vuravura kece, Na ulu-ni-vanua ko Saioni, na yasana sa donuya na tokalau; Na koro nei koya na Tui levu.

³ Sa kilai ko Jiova e na kena veivale vakaturaga mei drodro.

⁴ Raica, era sa soqoni vata na tui, Era lako vata yani.

⁵ Era raica, ka ra qai kidacala; Era kidroa, ka dro tani yani.

⁶ Sa kani ira ki kea na rere, Kei na rarawa, me vaka na yalewa sa taratara.

⁷ O sa vorolaka na waqa ni Tasisi E na cagi mai na tu-i-cake.

⁸ Me vaka na ka keimami rogoca, keimami sa raica ni vakakina, E na koro i Jiova ni lewe vuqa, e na koro ni noda Kalou: Ena vakataudeitaka na Kalou me sega ni oti rawa. Sela.

⁹ Keimami a veinanuyaka na nomuni yalololoma, na Kalou, E loma ni nomuni vale ni soro.

¹⁰ Me vaka na yacamuni, na Kalou, Sa vakakina na vakavinavinaka me ia vei kemuni ka yacova nai yalayala kei vuravura: Sa sinai na ligamuni matau e na cakacaka dodonu.

¹¹ Me reki na ulu-ni-vanua ko Saioni, Me ra marau na goneyalewa ni Juta, E na vuku ni nomuni lewa.

¹² Dou lako voli mai Saioni, ka vakavolivolita: Wilika na kena veivale cecere.

¹³ Vakaraica vinaka na kena bai, Vakananuma na kena veivale vakaturaga; Mo dou tukuna ki nai tabatamata ena muri mai.

¹⁴ Ni sa noda Kalou ka tawa mudu na Kalou oqo: Ena tuberi keda ko koya ka yacova na noda mate.