NA SAME 44 - Vakavakadewa Makawa

A nodra masu na tamata yalododonu, ni ra nanuma na cakacaka ni Kalou eliu kivei ira na nona tamata. Vua na Domo-ni-sere. A nodra na luve i Kora. A Masikili.

¹ Kemuni na Kalou, keimami a rogoca e na daliga i keimami, a ra sa tukuna vei keimami na neimami qase, Na cakacaka ko ni a cakava e na nodra gauna, e na gauna sa oti makawa.

² Ni kemuni a vakasevi ira tani e na ligamuni na lewe ni veimatanitu, ka sa tei ira ga kina; Kemuni sa vakararawataki ira na tamata, ka sa vakasevi ira tani.

³ Ni ra a sega ni rawata na vanua e na nodra i seleiwau, Se vakabulai ira na ligadra: A ligamuni matau duaduaga, kei na tabamuni, kei nai serau ni matamuni, Ni kemuni a lomani ira.

⁴ Sai kemuni ga na noqu Tui, na Kalou: Mo ni vakarota na nodra veivakabulai na Jekope.

⁵ E na vukumuni ga keimami na vakabalei ira sobu na neimami meca: E na vuku ni yacamuni keimami na butuki ira sobu era sa tu cake vakaivalu vei keimami.

⁶ Ni'u na sega ni vakararavi ki na noqu dakai, Ia na noqu i seleiwau ena sega ni vakabulai au.

⁷ Kemuni a vakabulai keimami maivei ira na neimami meca, Ia ko ira sa cati keimami ko ni sa vakamaduataka.

⁸ A Kalou ga keimami doka e na siga taucoko, Ka vakamolimoli ki na yacamuni ka sega ni mudu. Sela.

⁹ Ia oqo ko ni sa biuti keimami tani ka vakamaduataki keimami; O ni sa sega talega ni lako vata kei na neimami mataivalu.

¹⁰ O ni sa vakavuna na neimami vakanadakui ira na neimami meca: Ia ko ira sa cati keimami era sa tokia na neimami ka me nodra.

¹¹ O ni sa soli keimami me keimami vaka na sipi sa lewai me laukana; O ni sa vakasevi keimami ki na veimatanitu.

¹² O ni sa volitaki ira na nomuni tamata ka sa sega na kedrai voli, O ni sa sega ni vakavutuniyautaki kemuni e na kedrai voli.

¹³ O ni sa soli keimami me vakarogocataki vei ira era sa tiko voleka vei keimami, Me vakalialiai talega ka veiwalitaki vei ira sa tiko voliti keimami:

¹⁴ O ni sa soli keimami me vosabecitaki e na veimatanitu, Me ra kuretaka na uludra vei keimami ko ira na tamata.

¹⁵ Sa tu vakadua e mataqu na noqu veiseseyaki, Ka sa luvuci au sara na madua ni mataqu,

¹⁶ E na vuku ni domona sa dauveivakawai ka vosavakacaca; E na vuku i koya na meca sa dauveisausaumitaka na ca.

¹⁷ Sa yacovi keimami na ka kecega oqo; ia keimami sa sega ni guilecavi kemuni, Se keimami cakacaka vakailasu e na nomuni veiyalayalati.

¹⁸ Sa sega ni vuki tani na yalo i keimami, Se keimami lesu tani mai na nomuni sala e na neimami lako voli.

¹⁹ Ia ko ni sa vakamavoataki keimami e na vanua ni gata, O ni sa ubi keimami talega e na yaloyalo ni mate.

²⁰ Kevaka keimami sa guilecava na yaca ni neimami Kalou, Se dodoka na liga i keimami vua na kalou tani;

²¹ Ena sega beka ni qaqa oqo na Kalou? Ni sa kila ko koya na ka ni yalo sa vuni tu.

²² Io, e na vukumuni keimami sa vakamatei e na siga taucoko ka bogi; Keimami sa vakatauvatani kei na sipi ena vakamatei.

²³ Mo ni yadra mai, Kemuni sa moce, na Turaga, e na vuku ni cava? Mo ni tu cake mai, kakua ni biuti keimami vakadua.

²⁴ E na vuku ni cava ko ni sa vunia kina na matamuni, Ka guilecava na neimami rarawa kei na neimami vakacacani?

²⁵ Sa vakamalumalumutaki sobu ki na kuvu-ni-soso na yalo i keimami: Ka sa kabita na qele na kete i keimami.

²⁶ Mo ni tu cake me vukei keimami, Mo ni vakabulai keimami e na vuku ni nomuni yalololoma.