NA SAME 42 - Vakavakadewa Makawa

A masu ni tamata sa vakacacani e na vuku ni valavala dodonu. Vua na Domo-ni-sere. A Masikili, a nodra na luve i Kora.

¹ Me vaka sa tagica na wai drodro na me kila, Sa vakakina na yaloqu ni sa tagici kemuni na Kalou.

² Sa viagunu vua na Kalou na yaloqu, io vua na Kalou bula: Au na rairai ninaica e na mata ni Kalou?

³ A qau kakana tiko na wai ni mataqu e na siga kei na bogi, Ni ra kaya tikoga vei au, Evei na nomu Kalou?

⁴ Ni'u sa nanuma na ka oqo, sa luvu na yaloqu e lomaqu: Ni'u a lako vata kei ira na le vuqa, au a lako vata kei ira ki na vale ni Kalou, E na domo ni reki kei na vakavinavinaka, kei ira na le vuqa era ia na so levu tabu.

⁵ Na yaloqu, o sa bibi lako e na vuku ni cava? Se na vuku ni cava ko sa nuiqawaqawa e lomaqu? Mo nuitaka na Kalou, ni'u na vakavinavinaka tale vua, Ni sa noqu vu ni bula na matana.

⁶ Noqu Kalou, sa bibi lako na yaloqu e lomaqu: O koya oqo ka'u na nanumi kemuni kina e na vanua mai Joritani Kei na nodra na kai Erimoni, mai na ulu-ni-vanua ko Maisa.

⁷ Sa kaciva na wasa liwa na wasa liwa ni sa kere na nomuni savu: Sa sevi au na nomuni biau sese kece kei na nomuni biau tubu kecega.

⁸ Ia ena lewa ga ko Jiova na nona yalololoma me yaco mai kei na siga, Ia e na bogi ena tu ga vei au na nona sere, Kei na noqu masu vua na Kalou ni noqu bula.

⁹ Au na kaya vua na Kalou na noqu uluvatu, O ni sa guilecavi au e na vuku ni cava? A cava ka'u sa tagi voli kina ka ni ra sa vakasaurarataki au na meca?

¹⁰ Sa vaka nai seleiwau e na suiqu, na nodra vakasewasewani au na noqu meca; Ni ra tarogi au e na veisiga, Evei na nomu Kalou?

¹¹ Na yaloqu, o sa bibi lako e na vuku ni cava? O sa nuiqawaqawa e lomaqu e na vuku ni cava? Mo nuitaka na Kalou; ni'u na vakavinavinaka tale vua, Na vu ni bula ni mataqu kei na noqu Kalou.