NA SAME 41 - Vakavakadewa Makawa

A masu ni tamata sa kila na nona ca. Vua na Domo-ni-sere. A Same i Tevita.

¹ Sa kalougata ko koya sa nanuma na dravudravua: Ena vakabulai koya ko Jiova e na siga ni rarawa.

² Ena maroroi koya ko Jiova, ka vakabulai koya tiko: ena vakalougatataki e vuravura Ko ni na sega ni soli koya me ra veitaliataki koya ko ira na nona meca.

³ Ena vakaukauwataki koya ko Jiova ni sa malumalumu koto; O na cakava me vinaka tiko na nonai mocemoce ni sa mate no.

⁴ Au a kaya, I Jiova, ni lomani au mai: Ni vakavinakataka na yaloqu; ni'u a caka ca vei kemuni.

⁵ Sa vosavakacacataki au ko ira na noqu meca, ka kaya, Ena mate beka ninaica, ka me boko laivi kina na yacana?

⁶ Kevaka sa mai raica ko koya, sa na vosa vakailasu ga: Sa vakananuma tiko ki na ka ca e na vu ni yalona: Ia ni sa lako voli e tautuba sa tukuna.

⁷ O ira kecega era sa cati au, era sa vakasolokakanataki au vata: Era sa vakananuma na ka me'u ca kina.

⁸ Era kaya, Sa dua na mate ca sa kabiti koya: Ia ni sa qai koto ena sega ni duri cake tale.

⁹ Io, ko koya sa noqu i tau vakaidina, au vakararavi vua, o koya sa kania na noqu madrai, Sa laqeti au e na bukubuku ni yavana.

¹⁰ Ia koi kemuni, Jiova, mo ni lomani au mai, ka vakaduri au cake tale, Me'u sauma ga vei ira.

¹¹ A ka oqo ka'u kila kina ni kemuni sa vinakati au, Ni sa sega ni gumatua vei au na noqu meca.

¹² Ia koi au, ko ni sa vakataudeitaki au e na noqu yalododonu, Ka vakataudeitaki au e matamuni ka sega ni mudu.

¹³ Me vakavinavinakataki ko Jiova na Kalou ni Isireli, Mai na gauna sa sega ni tekivu ki na gauna sa sega ni oti. Emeni, Emeni.