NA SAME 4 - Vakavakadewa Makawa

A masu vua na Kalou, 1. Era sa vunauci na tamata ca, 2-5. Sa kalougata ko koya sa lomana ko Jiova, 6-8. Vua na Domo-ni-sere e na Nikinoca. A Same i Tevita.

¹ O ni rogoci au ni'u sa tagi, na Kalou ni noqu veivakadonui: Ko ni a vakalalagataki au ni'u a vakaosoosoi; Mo ni yalololoma talega mai vei au, ka rogoca na noqu masu.

² Koi kemudou na luve ni tamata, e bogi vica vata dou na vukica na noqu i ukuuku me ka ni veivakamaduataki? E bogi vica vata dou na lomana tiko na ka walega, ka dauvakasaqara na lasulasu? Sela.

³ Ia mo dou kila sa digitaka na tamata yalovinaka ko Jiova me nona: Ena vakarogoci au ko Jiova ni'u sa tagi vua.

⁴ Dou rere ga, kakua ni valavala ca: Veivosaki kei na yalomudou e na nomudou i mocemoce, ka tiko lo. Sela.

⁵ Dou vakacabora nai soro e dodonu, Ka vakararavi ga vei Jiova.

⁶ Era lewe vuqa era sa kaya, Ko cei ena vakaraitaka vei keda na ka vinaka? Kemuni Jiova, mo ni vakacilava vei keitou nai serau ni matamuni.

⁷ Ko ni sa solia ki na yaloqu na marau Sa uasivi cake e na nodra marau, e na gauna sa tubu cake kina na nodra sila kei na nodra waini.

⁸ Au na davo no e na vakacegu, ka moce talega; Ni sai kemuni duaduaga, Jiova, sa vu ni noqu tiko vinaka.